Almatynyń birqatar kóshesinde kólik qozǵalysynyń jyldamdyǵy shekteledi
ASTANA. QazAqparat - Almatynyń birqatar kóshesinde kólik qozǵalysy jyldamdyǵyna shekteý engiziledi. Bul týraly búgin Ortalyq kommýnıkatsııalar qyzmetindegi brıfıngte Almaty ákimi Baýyrjan Baıbek qaladaǵy kóshe ataýlarynyń jıi ózgerýine qatysty pikir bildirdi, dep habarlaıdy QazAqparat tilshisi.
«Almaty elimiz boıynsha jol apaty, sonyń saldarynan ólim-jitim boıynsha birinshi orynda turǵany qupııa emes. Jol boıyndaǵy adam ólimi júrgizýshilerdiń jyldamdyq rejimin buzý saldarynan jıi oryn alyp jatatyndyǵyn bilesizder. Sondyqtan túbegeıli sharalar qabyldaý qajettigi týyndap otyr. Sondyqtan ótken jyly ortalyq kóshelerde bir baǵyttaǵy qozǵalys engizilip, jyldamdyq saǵatyna 40 shaqyrymǵa shekteldi», - dedi Baýyrjan Baıbek.
Ákimniń dereginshe, qabyldanǵan sharalardyń nátıjesinde máselen, Qurmanǵazy kóshesi boıyndaǵy jol-kólik apaty 41 paıyzǵa, al Shevchenko kóshesinde 4 esege qysqarǵan.
«Sondyqtan sarapshylar men qoǵamnyń negizgi bar talaptaryn eskere otyryp Ál-Farabı, Saın jáne shyǵys aınalma jolynda saǵatyna 60 shaqyrymǵa deıin shekteý engiziledi. Buǵan deıin saǵatyna 80 shaqyrym bolǵan. Baqylaý jasaý úshin 142 «aqyldy» bekettegi kórinbeıtin aımaqqa kameralar ornatylady. Jyldamdyqty nebári saǵatyna 20 shaqyrymǵa tómendetý arqyly ondaǵan ómirdi qutqaryp qalýǵa bolady», - dedi Baýyrjan Baıbek.
