Almatynyń birqatar dámhanarynda daıyn tamaqtan jándikter tabyldy
ALMATY. QazAqparat - Almatyda azyq-túlikterdiń sapasy boıynsha 49 aryz túsip, birneshe dámhanadaǵy tamaqtardan jándikter tabylǵan. Bul týraly Almaty qalasy Qoǵamdyq densaýlyq saqtaý departamentiniń basshysy Aızat Moldaǵasımova aıtty, dep habarlaıdy QazAqparat tilshisi.
Búgin Almaty qalasynyń Óńirlik kommýnıkatsııalar qyzmeti alańynda ótken baspasóz máslıhatynda Almaty qalasy Qoǵamdyq densaýlyq saqtaý departamentiniń basshysy Aızat Moldaǵasımova dámhanalardaǵy daıyn taǵamnan jándik shyqqanyn aıtty.
«Tamaqtardyń kógerip ketkeni, jándikter tabylǵany týraly, nannyń sapasy men sút ónimderine qatysty barlyǵy 49 aryz tústi. «Donalds» fast fýdynda, «Sary Arqa» bazarynda, «Adal» dúkeni men «ADK» gıpermarketine, «Rýzı nan» naýbaıhanasynda kógergen azyq-túlikter shyqty. «Rom kafe», «Mezzalýna», «Dýnganka», «Tabýko», «Laffa» dámhanalarynda daıyn taǵamnan jándikter shyqqan. Sonymen qatar, Vıktorııa», «Dostyq», «Túrgen» dúkenderindegi ónimderdiń saqtalý merzimi ótip ketken.
Anyqtalǵan kemshilikter boıynsha ákimshilik sharalar qoldanyldy. 907 600 teńge kóleminde 19 aıyppul salyndy, onyń ishinde 6-y tamaq, saýda oryndary boıynsha. Olar: «Vıktorııa», «Magným», «Dostyq», «Túrgen», «Sevılııa», «Afon-pro» dúkenderi. 13 qoǵamdyq tamaqtandyrý kásiporynyna 16 uıǵarym berilip, is-áreketin toqtatý boıynsha 2 materıal sotqa joldandy. Olar: «Jadyra -jaına», «Jaısan», «Taglaýra», «Ata doner», «Tandor», «Iftar», fast fýd «Donalds», «Roma kafe», «Edem», «Na dache», «Tastemır», «Mezzalýna» dámhanasy men ashanasy», - dedi ol.
