Almatynyń bir aýdanynda úsh emdeý mekemesi salynady
ALMATY. QazAqparat - Almaty qalasynyń Naýryzbaı aýdanynda 500 kelýshige arnalǵan 2 jańa emhana men 1 dárigerlik ambýlatorııa salynady.
Erbolat Dosaev qala turǵyndarymen kezdesýde qurylys medıtsınalyq qyzmetterdiń sapasyn arttyratynyn aıtty, dep habarlaıdy QazAqparat tilshisi.
«Quramys shaǵynaýdanyndaǵy birinshi emhana boıynsha jobalaý-smetalyq qujattamasy ázirlenýde. Qazan aıynda memlekettik saraptamanyń oń qorytyndysyn alamyz dep oılaımyn. Qarjynyń bólinýine qaraı qurylysty 2024 jyldyń I-shi toqsanynda bastaýdy josparlap otyrmyz», - dedi ol.
Sonymen qatar, ol ekinshi emhana boıynsha Shuǵyla shaǵynaýdanynda jobalaý uıymymen shart jasalǵanyn atap ótti.
«Osy jyldyń IV-shi toqsanynda memlekettik saraptamanyń oń qorytyndysyn alý kózdelip otyr, qurylys 2024 jyldyń kókteminde bastalady. Buǵan qosa, Aqjar shaǵynaýdanyndaǵy 200 oryndyq dárigerlik ambýlatorııa boıynsha jobalaý-smetalyq qujattama ázirlenip jatyr. Qurylys shamamen 2024 jyldyń II-shi toqsanynda bastalady»,- dedi Erbolat Dosaev.
