Almatynyń bıotehnologtary Mańǵystaýda túıe sútin óndirýge kómektespek

ALMATY. QazAqparat - Almatynyń jas bıotehnologtary Mańǵystaýda ashylǵan túıe sútin óndiretin zaýytta tájirıbe jınaıtyn boldy. Bul týraly QazAqparat tilshisine «Asia milk» sút zaýytynyń dırektory Ashatjan Ybyraı aıtyp berdi.

Mańǵystaý oblysynda Qazaqstanda alǵash ret túıe sútin óndiretin zaýyt iske qosyldy. Oǵan «Bıznestiń jol kartasy - 2020» baǵdarlamasy boıynsha 600 mln teńge jaratyldy. Zaýyt dırektory Ashatjan Ybyraı búgingi tańda túıe sútinen jasalǵan 40-tan astam ónim dúkenderde satyla bastaǵanyn aıtty. 

«Túıe súti zaýyty Mańǵystaý oblysy ákiminiń qatysýymen ashylyp otyr. Zaýyt eýropalyq qurylǵylarmen jabdyqtalǵan. Búgingi tańda shyǵarylatyn ónim túrleri 40-qa jetti. Naqtyraq aıtqanda, olar bınónimder: aıran, ıogýrt, sút, súzbe, shubat, shalap, tań, t.b. Biz Almatydan bilikti mamandardy shaqyrtyp otyrmyz. Sonymen qatar, Almatynyń tehnologııalyq oqý oryndarynda bıotehonologııa boıynsha bilim alǵan jas mamandardy da jumysqa tarttyq. Bizdiń zaýyt táýligine 50 tonna ónim shyǵarady. Aldaǵy ýaqytta shyǵarylatyn ónim túrin 60-qa jetkizýdi kózdep otyrmyz. Qazirgi ýaqytta 15 sút qabyldaıtyn oryn ashyp jatyrmyz. Mysaly, Qyzan, Taýshyq sekildi eldi meken sharýalary endi ónimderin qalaǵa tasyp álek bolmaı bizdiń qabyldaý ornymyzǵa ótkize alady. Túıe sútiniń lıtrin 350-450 teńgeden, maılylyǵy joǵary bolsa 500 teńgeden qabyldaımyz», - deıdi dırektor A. Ybyraı. 

Onyń aıtýynsha, Qazaqstanda shyǵa bastaǵan sút ónimderine reseılikter «quda» túse bastaǵan.

«Ónimderimiz Mańǵystaýdaǵy dúkenderde satyla bastady. Reseılikterden, Máskeý qalasynan suranystar túse bastady. Olar túıe sútiniń paıdalylyǵyn eskerip otyr. Qazirgi ýaqytta zaýytymyzda 35 adam jumys jasaıdy. Jumysqa jergilikti mamandardy da tartýdy kózdep otyrmyz. Túıe sútinen bólek sıyr sútinen de ónim shyǵarmaq josparymyz bar», - deıdi Ashatjan Ybyraı.

Ashatjan Ybyraıdyń aıtýynsha, Qazaqstandaǵy alǵashqy túıe sútiniń ónimderi naýryz aıynan bastap, elimizdiń batys óńirlerinde satyla bastamaq.