Almatynyń bilim basqarmasy Sharyn shatqalynda selden kóz jumǵan muǵalim týraly aıtty
ALMATY. QazAqparat - Almaty qalasynyń bilim basqarmasy Sharyn shatqalynda oqýshylardy qutqarý kezinde qaza tapqan muǵalim týraly aıtty, dep habarlaıdy QazAqparat tilshisi.
Almaty qalasy bilim basqarmasynyń málimetinshe, 26 jastaǵy Mereı Ibragımov kórkemóner pánderinen sabaq bergen. Eńbek ótili – 5 jyl.
Keıingi 3 jylda ol №199 gımnazııada jumys istegen.
«Óte jaýapty muǵalim, búkil oqýshynyń súıikti ustazy, óz isiniń sheberi, birneshe býyn túlekterine bilim berip, tárbıelep shyǵardy. Erekshe jarqyn shyǵarmashyl adam, ómirde jetekshi, maqsatshyl edi», – dep atap ótti bilim basqarmasynan.
Kýágerlerdiń aıtýynsha, qaıǵyly oqıǵa kezinde Mereı Ibragımov balalarǵa kómektesken.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolǵany, taǵy bireýiniń iz-túzsiz joǵalǵany habarlanǵan bolatyn.
Keıin Bilim jáne ǵylym mınıstrligi atalǵan oqıǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumysy júrgizilip jatqanyn málim etken edi.
«Sharyn shatqaly» qyzmetkerleri Sharyn ózeniniń boıyn jaǵalaı jer betinde izdeý-qutqarý jumystaryn júrgizý barysynda 30 mamyr tańǵy saǵat 09:34-te 2010 jyly dúnıege kelgen qyz balany tapty.
Ol Sharyn ózeniniń sol jaǵalaýynda oqıǵa ornynan 3-4 shaqyrym jerden tabylǵan.
Sharyn shatqalynda selge aqqan qyz bala qutqarylǵan sát beınelengen vıdeo jarııalandy.
Sharyn shatqalynda joǵalǵan 11 jasar qyz oqıǵanyń qalaı bolǵanyn aıtyp berdi.
Almaty qalalyq bilim basqarmasy Sharyn shatqalyna ekskýrsııa mektep ákimshiligimen kelisilmegenin jetkizdi.
Foto:instagram.com/ibragimovmerey
