Almatynyń basty shirkeýine Rojdestvo merekesin qarsy alýǵa 5000-nan astam adam keldi (FOTO)
ALMATY. QazAqparat - Búgin hrıstıan dininiń pravoslavııa aǵymyn ustanýshy qazaqstandyqtar Rojdestvo Hrıstovo dinı merekesin atap ótip jatyr.
2016 jyldyń 6-shy jeltoqsanynan 7-shi jeltoqsanyna qaraǵan túni Astana jáne Qazaqstan mıtropolıti Aleksandr Almatydaǵy
Áýlıe-Voznesenskıı Kafedraldy shirkeýinde qudaıǵa qulshylyq etý rásimin ótkizdi. Ońtústik Astananyń basty shirkeýine Rojdestvo merekesin qarsy alýǵa 5000-nan astam adam keldi.
Dinı ánderdi Reseıdiń eńbek sińirgen óner qaıratkeri Oleg Ovchınnıkovtyń basqarýymen Mıtropolıt Okrýgynyń hory oryndady.
Merekege Gretsııanyń Afon túbegindegi áýlıe Pavel ǵıbadathanasynan áýlıe abyzdardyń (volhvy) syıy salynǵan sandyqshanyń kóshirmesi men sol abyzdar - Melhıor, Gaspar jáne Valtasardyń súıekteriniń bir bólshegi arnaıy jetkizildi.
Mıtropolıt Aleksandr din basylaryn jáne kelgen jurtshylyqty Rojdestvo merekesimen quttyqtap, sóz sóıledi.
Shirkeýdiń irgesine Isa týǵan Vıfleem úńgirin beıneleıtin sahnalyq qurylym qoıyldy. Shyrshanyń butaqtarynan jasalǵan bul qurylymǵa Márııamnyń, Iosıftiń, Isanyń jáne abyzdar men shopandardyń músinderi qoıyldy. Dindarlar olardyń aldyna shamdar jaqty.
«Isanyń týylýy árbir adamnyń jan dúnıesine baǵyttalǵan. Bul mereke árbir otbasyna bereke-birlik ákelsin, árbir adamnyń júregine rýhanı kúsh, bolashaqqa degen senim shýaǵyn syılasyn», - dedi óz sózinde mıtropolıt Aleksandr.
