Almatynyń bas josparynyń jobasy qashan bekitiledi
ALMATY. QazAqparat - Almaty qalalyq josparlaý jáne ýrbanıstıka basqarmasynyń basshysy Almashan Ahmedjanov shahardyń bas josparynyń jobasy qashan aıaqtalatynyn aıtty, dep habarlaıdy QazAqparat tilshisi.
«Almatyda bas jospardy ázirleý jáne dızaın-kodty engizý, biryńǵaı erejelerdi qurý boıynsha jumystar jalǵasyp jatyr. Bas jospardyń jobasy boıynsha jumysty aıaqtaý 2020 jyldyń sońyna belgilengen bolatyn. Ony bekitý 2021 jyldyń І toqsanyna josparlanǵan»,– dedi basqarma basshysy.
Sonymen qatar, ol buǵan deıin «Almaty qalasynyń erekshe mártebesi týraly» QR Zańyna qabyldanǵan ózgerister men tolyqtyrýlarǵa sáıkes, Almaty ákimdiginiń sáýlet jáne qala qurylysy salasyndaǵy qyzmeti úılestirýge múmkindik beretin quzyrettiligi keńeıgenin atap ótti.
«Bas jospardy túzetýdiń negizgi maqsaty qalanyń turaqty damýyn qamtamasyz etý, qaýipsiz, qolaıly, jaıly qalalyq orta qurý. Bul Almatyny «shetsiz qala» etedi», - dedi ol.
«Almaty qalasynyń erekshe mártebesi týraly» Zańǵa, sonymen birge, dızaın-kodty engizý boıynsha norma engizildi, ol óz kezeginde Almaty qalasy aýmaǵyndaǵy ǵımarattardyń qasbetteriniń, jarnama konstrýktsııalarynyń arhıtektýralyq sheshimderine, jazǵy alańdarǵa, shaǵyn sáýlet nysandaryna qoıylatyn talaptardy, sondaı-aq olardy ornalastyrýdy júıelendirip, retke keltiredi.
«Almatyda dızaın-kodty engizý – Qazaqstan úshin pılottyq joba. Kóp eńbekti talap etetin bul jumys muqııat zertteýdi, shyǵarmashylyq kózqarasty jáne naqty belgilengen erejelerdi talap etedi. Birqatar tarmaqtar boıynsha qoǵamdyq tyńdaýlar ótkizildi. Alaıda, pandemııa túzetýler engizdi: qoǵamdyq tyńdaýlar biraz ýaqytqa toqtatyldy», - dedi Almashan Ahmedjanov.
Sonymen qatar, ol bıylǵy jyly qalanyń kóptegen jazǵy alańdary jalpy talaptardy eskere otyryp resimdelgenin jetkizdi. Jóndeýge nemese rekonstrýktsııalaýǵa daıyndyq kezinde keıbir iri tamaqtaný oryndary ǵımarat pen oǵan irgeles aýmaqty jobalaý boıynsha usynystar alý úshin basqarmaǵa júginýde.
«Biryńǵaı erejelerdi qurý boıynsha jumys jalǵasýda. Dızaın-kod jobasy qala turǵyndaryna talqylaý úshin usynylatyn bolady. Qujatty engizý boıynsha qoǵamdyq tyńdaýdy qaıta bastaý merzimi qala men eldegi epıdemııalyq jaǵdaıǵa baılanysty bolady», - dep atap ótti A.Ahmedjanov. Almatynyń ortalyǵy men shet aımaqtarynda qolaıly ortany damytý jónindegi Bas jospardyń jobasy 2021 jyly bekitiledi
