Almatynyń bas josparyna azamattardyń usynysy engiziledi - ákimdik
ALMATY. QazAqparat - Almaty qalalyq josparlaý jáne ýrbanıstıka basqarmasynyń basshysy Almashan Ahmedjanov onlaın talqylaýda shahardyń bas jospary týraly aıtty, dep habarlaıdy QazAqparat tilshisi.
«Keıbir buqaralyq aqparat quraldarynda Almaty ákimdigi 1 qańtarda qalanyń bas josparyn bekitpekshi degen maqala jarııalandy. Alaıda, bul shyndyqqa janaspaıdy. Sondyqtan búgin biz alǵashqy tyńdaýdy ótkizip jatyrmyz. Zańdy talaptar bar, olar boıynsha barlyq protsedýralar oryndalýy kerek. Biz bas jospardyń ár bólimin kestege bóldik «, - dedi Almashan Ahmedjanov qalanyń jańa bas josparyn onlaın talqylaý kezinde.
Onyń aıtýynsha, bas jospar - bul saıası emes, qala aýmaǵynyń turaqty damýyn qarastyratyn jáne qamtamasyz etetin normatıvti-tehnıkalyq qujat.
«Aldymen biz sizdermen bas josparǵa qandaı shekteý engizý kerektigin talqylaımyz. Búgin qalada 1 920 000 turǵyn bar. Olardyń sany ósip jatyr. Sondyqtan, bas jospar, eń aldymen qalany damytýǵa arnalǵan qujat. Onyń ishinde problemalar bar: ekologııalyq, ınfraqurylymdy damytý, áleýmettik nysandardyń jetispeýshiligi jáne taǵy basqalary», - deıdi ol.
Spıker azamattardyń usynysy men tilekteri bas josparǵa engizilgennen keıin qujat qala máslıhatyna, sodan keıin QR Úkimetine usynylatynyn atap ótti.
«Bas jospar 12 bólimnen turady. Sarapshylarmen bólek kezdesý uıymdastyramyz. Biz bas jospar jobasyn birden qabyldaıyn dep jatqanymyz joq. Aldymen ony sizdermen talqylaǵymyz keledi. Sodan keıin biz qala turǵyndarynyń barlyq pikirlerin eskerip, jobalaýshy uıymmen sóılesemiz. Birinshi kezeń - qoǵamdyq jáne ekologııalyq tyńdaý ótedi. Búgin ótip jatqan shara. Odan keıingi tyńdaý qańtarda ótedi, biz sáýlettik-josparlaý sheshimderin talqylaımyz .Úshinshi kezeń - ekonomıkalyq negizdeme bólimderin talqylaý. Biz bul kezeńge birtindep bara jatyrmyz. Biz bárin 10 mınýtta qabyldamaımyz. Bizdiń mindetimiz - barlyq azamattar men sarapshylardyń pikirin tyńdaý», - dedi spıker.
