Almatynyń bas josparyn talqylaý: megapolıs aýasyn qalaı tazartýǵa bolady
ALMATY. QazAqparat- Ekologııalyq tepe-teńdikti turaqty saqtaý úshin qalalyq ekojúıeni biriktirip, bıoártúrlilikti qamtamasyz etetin qalanyń turaqty «ekologııalyq» qańqasy jasalady. Bul týraly Almatynyń bas josparyn qoǵamdyq talqylaý barysynda «Almatybasjospar» ǴZI bas dırektorynyń orynbasary Aınur Sarbaeva málimdedi, dep habarlaıdy QazAqparat tilshisi.
Aıtýynsha, oǵan jańa rekreatsııalyq aımaqtar men qalany taý bókterinen oıpattarǵa deıin kesip ótetin jáne qalanyń tabıǵı jeldenýine jaǵdaı jasaıtyn «jasyl» ózen dálizi kiredi.
«Aýanyń jeldetilýi men atmosferadaǵy lastaýshy zattardyń seıilý deńgeıin jaqsartý maqsatynda, aýa aınalymynyń buzylýyna jol bermeý úshin jeldiń baǵytyn eskere otyryp, qalany odan ári damytý jóninde sheshimder qabyldanady. Jel rejımin eskere otyryp, qurylys salýdyń bas josparyna túzetýler engiziletin bolady»,- deıdi Aınur Sarbaeva.
«Almatybasjospar» ǴZI ókiliniń sózinshe, qalanyń qazirgi jasyl qory jylyna orta eseppen 1,3 mln tonnaǵa deıin shań jınaıdy, 16 myń tonnaǵa deıin ottegin óndiredi.
«Osydan mynadaı qorytyndy jasaýǵa bolady – zııandy zattardyń keri áserin azaıtýdyń eń tıimdi sharasy jasyl qordy saqtaý jáne ony odan ári turaqty damytý bolyp tabylady. Operatorlar (tabıǵatty paıdalanýshy kásiporyndar) Ekologııa kodeksiniń normalary sheńberinde jańa tehnologııalardy, onyń ishinde zamanaýı shań-gazdy tazartý qondyrǵylaryn engizýi tıis»,- dep atap ótti ol.
Belgilengen sanıtarııalyq-gıgıenalyq normalarǵa qol jetkizilmegen jaǵdaıda kásiporyndar Indýstrııalyq aımaqqa nemese Almaty aglomeratsııasynyń basqa aýdandaryna kóshiriletin bolady (sanıtarııalyq-qorǵaý aımaqtarynyń belgilengen kólemi saqtalady).
Erekshe qorǵalatyn tabıǵı aýmaqtardy qorǵaý jáne shamadan tys rekreatsııalyq júktemeni boldyrmaý úshin olarǵa kóliktiń ekologııalyq taza túrlerimen ǵana kirýge ruqsat etiledi (qazirgi ýaqytta aýystyryp-otyrýǵa arnalǵan turaqtar bar jáne elektr taksıleri jumys isteıdi), qorshaǵan ortaǵa keri áser etetin obektilerdi kóptep salýǵa ruqsat berilmeıdi.
«Jańa bas josparda mindetterdi sheshý úshin negizgi tabıǵı shekaralar boıynsha qala aýmaǵyn ońtústikten soltústikke qaraı kesip ótetin syzyqtyq saıabaq beldeýlerin qurý qajet. Alleıalar, býlvarlar, aýqymdy baǵyttaǵy demalys aımaqtary júıesin uıymdastyrý, jańa baqtar, skverler, býlvarlar, alleıalar, sondaı-aq áýe basseınin saýyqtyrýǵa tıimdi áser etetin iri saıabaq keshenderin qurý, sondaı-aq endik ári merıdıandyq baǵyttarda ózara baılanysty saıabaqtar, skverler, býlvarlar, alleıalar jáne basqa da ashyq keńistikter júıesin qurý kerek. Qazirgi skverlerdi rekonstrýktsııalaý, keńeıtý, abattandyrý jáne qalpyna keltirý, jańa áserli landshafttar qurý kózdelgen»,- Aınur Sarbaeva.
Sondaı-aq, jańa Bas josparda qala mańyndaǵy rekreatsııalyq aımaqtarda nazardan tys qalmady. Megapolıste shamamen 2,5 mln jańa aǵashtyń otyrǵyzylýy mańyzdy.
«Qalany kógaldandyrý boıynsha belsendi jumys júrgizý bizge Ońtústik astanaǵa Memleket basshysynyń Almatyǵa sapary kezinde atap ótken «baqsha qala» ataǵyn qaıtarýǵa múmkindik bermek»,- deıdi spıker.
