Almatynyń bas jospary: sarapshy kvartaldyq qurylystyń artyqshylyqtaryn atady
ALMATY. QazAqparat- Kvartaldyq qurylys qalanyń kez kelgen aýdanyndaǵy turǵyndar úshin qolaıly áleýmettik ortany quraıdy. Onyń arqasynda turǵyn ǵımarattar áleýmettik-turmystyq ınfraqurylym obektileri men demalys aımaqtarynyń janynda ornalasatyn bolady.
Bul týraly Qazaqstannyń qurmetti sáýletshisi Saıran Fazylov aıtty, dep habarlaıdy Qazqparat tilshisi.
Saıran Fazylovtyń sózinshe, Almatynyń jańa Bas damý josparynyń negizgi aspektileriniń biri - jańa turǵyn úı qurylysy kezinde qalanyń ortalyq bóliginiń tarıhı qalyptasqan kvartaldyq qurylysynyń sabaqtastyǵymen baılanysty bolýy.
«Meniń oıymsha, bul tásil mádenı jáne arhıtektýralyq murany saqtaý turǵysynan mańyzdy ári úılesimdi jáne jaıly qalalyq ortany qurýǵa yqpal etedi»,- deıdi sáýletshi.
Onyń aıtýynsha, qazir Almatynyń tarıhı ortalyǵy ǵana jaıly qalanyń zamanaýı modeliniń negizgi talaptaryna saı keledi. Ol mektepter men balabaqshalarǵa, qoǵamdyq keńistikterge jaıaý jetýge jaqsy múmkindik jasaıdy.
«Bas jospar aıasynda kólemi 160 h250 metr kvartaldardyń parametrleri paıdalanylatyn bolady. Bul damýdyń ońtaıly qurylymyn, sondaı-aq burynnan bar kvartaldarmen úılesimdilikti qamtamasyz etedi, osylaısha qalalyq keńistiktiń birligi men tutastyǵyn saqtaıdy»,- dedi spıker.
Sonymen qatar, ol sońǵy onjyldyqta qala negizinen taý bókterine jaqyn ortalyq jáne joǵarǵy (ońtústik) bólikterinde damyǵanyn atap ótti. Byltyr jaz aıynda júrgizgen qalalyq saýalnamanyń aldyn ala nátıjeleri kórsetkendeı, qala turǵyndaryna áleýmettik nysandar, qoǵamdyq keńistikter, balalardy damytý ortalyqtary, úıirmeler, sektsııalar, sport alańdary jetispeıdi. Kommertsııalyq nysandardyń ishinde fıtnes ortalyqtary, shyǵarmashylyq sheberhanalar, otbasylyq kafeler men kovorkıngter jetkiliksiz.
«Kvartaldyq qurylys, birinshiden, qalanyń kez kelgen aýdanyndaǵy turǵyndar úshin qolaıly áleýmettik ortany quraıdy. Ekinshiden, bul kólik keptelisi men turaq máselelerin sheshýge múmkindik beredi. Úshinshiden, jasyl aımaqtardyń ulǵaıýyna yqpal etedi. Kvartaldyq qurylystyń arqasynda turǵyn ǵımarattar áleýmettik-turmystyq ınfraqurylym obektileri men demalys aımaqtarynyń janynda ornalasatyn bolady. Mundaı damý qurylys úshin qoljetimdi aýmaqtardy áldeqaıda tıimdi paıdalanýǵa múmkindik beredi, bul turǵyn úıdi adamdar úshin qoljetimdi etedi»,- deıdi sarapshy.
Aıta keteıik, QR Úkimeti Almaty qalasynyń 2040 jylǵa deıingi Bas josparyn bekitti.
