Almatynyń bas sanıtar dárigeri tumaýdan qorǵanýdyń birneshe tásilin atady
ALMATY. QazAqparat – Almaty qalasynyń Bas memlekettik sanıtarııa dárigeri Jandarbek Bekshın onlaın brıfıng barysynda tumaý, JRVI-diń aldyn alatyn qarapaıym tásilderdi atady, dep habarlaıdy QazAqparat tilshisi.
Onyń aıtýynsha, tumaýdan qorǵanýdyń vaktsınadan basqa qarapaıym sharalary bar.
«Dárigerdiń ruqsatymen vırýsqa qarsy preparattardy «Anaferon», «Interferon», «Vıferondy» qoldanýǵa bolady. Sonymen qatar, vırýsqa qarsy jaqpamaılardy «Oksalın», «Antıvırdi» paıdalaný kerek. Immýnıtetti kóteretin aqýyzǵa, dárýmenderge jáne mıneraldy zattarǵa baı tamaq ónimderin tutynǵan jón. Áleýmettik araqashyqty saqtaý, naýqas adamdarmen qarym-qatynasty shekteý, adamdar kóp jınalatyn jerlerge barmaý, mezgilge sáıkes kıiný kerek» - dedi Jandarbek Bekshın.
Sonymen qatar, ol halyq kóp jınalatyn jerler men naýqasqa kútim jasaǵanda naýqas adam da, deni saý adam da medıtsınalyq betperde kııýi qajettigin aıtty.
«Naýqas úıde bolǵanda ony oqshaýlap, bólmeni jıi jeldetip, naýqas jáne úıdegiler maska kıip júrý, sonymen qosa naýqasqa jeke ydys bólgen durys. Qoldy jıi jýý kerek, eger qoldy sabynmen jýýǵa múmkindik bolmasa, quramynda spırt bar nemese dezınfektsııalyq quraldardy paıdalaný qajet. Ata-analar aýyrǵan balasyn balabaqshaǵa, mektepke jibermeýi kerek. Osy atalǵan qarapaıym nusqaýlardy saqtaý sizderdi JRVI men tumaý aýrýynan qorǵaıdy», - dedi ol.
