Almatynyń bas sanıtar dárigeri maska taǵýdyń talaptaryn aıtty

ALMATY. QazAqparat – Almatyda ótken onlaın brıfıng barysynda qalanyń bas sanıtar dárigeri Jandarbek Bekshın maska taǵýdyń talaptaryn aıtty, dep habarlaıdy QazAqparat tilshisi.

Onyń aıtýynsha, qalada qazir eń negizgi kásiporyndar ǵana jumys isteýge kirisken. Bas sanıtar dáriger jumysqa shyqqan qyzmetkerlerge barlyq erejeni saqtaý kerektigin eskertti.

«Biz óte aýyr ınfektsııamen betpe-bet kelip otyrmyz. Vırýs aýa tamshylary arqyly, turmystyq baılanys arqyly, jýylmaǵan azyq-túlikpen de juǵa beredi. Vırýs – bireý, juǵý joldary óte kóp. Eń aldymen turǵyndarǵa dárihanalar men azyq-túlik dúkenine barǵanda maska men qolǵap kııýge keńes beremin. Saýda oryndarynda belgilengen qashyqtyqty saqtaýdy talap etemiz. Qyzmetkerlerge mindetti túrde qalta antıseptıgin alyp júrýi kerek», - deıdi Bekshın.