Almatynyń bas polıtseıi terrorısterdiń qolynan qaza tapqan áriptesteriniń otbasyna bardy

ALMATY. QazAqparat- Almaty qalalyq polıtsııa departamentiniń basshysy Qanat Taımerdenov lańkesterdiń qolynan qaza tapqan polıtsııa serjanty Alen Asylhanov, polıtsııa starshınasy Rınat Qambetov pen polıtsııa kishi serjanty Nurbolsyn Almasovtyń otbasyna baryp kóńil aıtty, dep habarlaıdy QazAqparat tilshisi.

Qanat Taımerdenovtyń aıtýynsha, olar Almaly aýdandyq PB janyndaǵy polıtsııa bóliminiń ákimshilik ǵımaratyna jáne strategııalyq mańyzy bar nysanǵa jasalǵan shabýylǵa toıtarys berý kezinde qaza tapty.

«Lańkestermen kúreste qaza tapqan áriptesterimizdiń týystarymen birge qaıǵyramyz. Olar azamattardyń qaýipsizdigi úshin janyn qıǵan naǵyz batyrlar. Nurbolsyn Almasov, Rınat Qambetov jáne Alen Asylhanovtyń erligi, Otan aldyndaǵy janqııarlyq qyzmeti bizge de, bolashaq urpaqqa da jarqyn úlgi bolmaq. Máńgilik estelik», - dedi, Qanat Taımerdenov.

- polıtsııa serjanty Asylhanov Alen Muhıtuly, 1993 jyly týǵan, ishki ister organdarynda 2015 jyldan beri qyzmet etken, úılengen, bir jasar uly bar.

- polıtsııanyń kishi serjanty Almasov Nurbolsyn Ǵanıuly, 1994 jyly týǵan, ishki ister organdarynda 2021 jyldan beri qyzmet etken, úılenbegen.

- polıtsııa starshınasy Qambetov Rınat Talǵatuly, 1988 jyly týǵan, ishki ister organdarynda 2010 jyldan beri qyzmet etken, úılengen, eki ul tárbıelep otyrǵan.

Lańkestik áreketterdiń jolyn kesý, sondaı-aq, memlekettik organdardyń ákimshilik ǵımarattary men strategııalyq nysandaryna jasalǵan qarýly shabýyldardy toıtarý nátıjesinde barlyǵy Almaty polıtsııasynyń 3 qyzmetkeri qaza tapty, taǵy 176 saqshy jaraqat aldy, onyń 8-iniń jaǵdaıy aýyr.