Almatynyń bas polıtseıi Ksenııa Ashyǵalıevaǵa qatysty istiń mán-jaıyn aıtty
ALMATY. QazAqparat – Almaty qalalyq Polıtsııa departamentiniń basshysy Serik Kúdebaev ánshi Ksenııa Ashyǵalıevanyń isine qatysty tergeý sharalary týraly aıtyp berdi, dep habarlaıdy QazAqparat tilshisi.
«Bul derek boıynsha QR QK-niń 110-baby (qorlyq kórsetý) sotqa deıingi tergeý amaldary bastaldy. PD tergeý basqarmasy QR QK-niń 126-babynyń 2-bóligimen (bas bostandyǵynan zańsyz aıyrý) qosymsha is qozǵady. Baýyrjan Ashyǵalıev ýaqytsha ustaý oqshaýlaǵyshyna qamaldy. Jaqyn arada oǵan qatysty bultartpaý sharasy qabyldanady»,- dedi Serik Kúdebaev.
PD basshysy tergeý jumystarynyń obektıvti ótýine kepildik beretinin atap ótti.
«Qylmys bolǵan jer - úıdiń jertólesi tekserildi. Dálelder bazasy jınaldy. Betpe-bet kezdesýler uıymdastyryldy. Ashyǵalıevanyń ótinishimen tóbeleske arasha túsken kýágerden jaýap alyndy. Sol kezde qasynda bolǵan kúdiktiniń dosy da jaýap berdi. Ol iske kýáger retinde qatysady. Tergeýdiń osy kezeńinde Ksenııa Ashyǵalıevanyń aıtqandaryn bári rastap otyr. Aıypty adamdar mindetti túrde jazasyn alady», - dedi Serik Kúdebaev.
Munyń aldynda Ksenııa Ashyǵalıeva óziniń kúıeýi Baýyrjan Ashyǵalıevtiń uryp-soqqanyn aıtyp Feısbýktegi #NeMolchıKZ tobyna shaǵymdanǵan edi.
Qylmystyq isti tekserý protsesin polıtsııa departamentiniń basshysy óz baqylaýyna aldy.
Ksenııa Ashyǵalıeva «Jackpot» tobynyń ánshisi bolsa, onyń kúıeýi Baýyrjan Ashyǵalıev osy topta gıtarashy.
