Almatynyń bas kóshelerinen qyryp alynǵan eski asfalt kádege jaraıdy
ALMATY. QazAqparat - Almaty kóshelerindegi eski asfalt kádege jaraıdy, ony topyraq joldarǵa tóseýge bolady, dep habarlaıdy QazAqparat tilshisi.
Almaty kóshelerinen shyqqan eski asfalttyń 80%-y topyraq joldardyń ústingi qabatyna tóseý úshin qoldanylady. Aýdan ákimdikteriniń ótinishi boıynsha 6 myń tonnadan astam eski asfalt úgindisi ınjenerlik kommýnıkatsııalar júrgizilgen shaǵyn aýdandardyń jolyn qalpyna keltirý úshin paıdalanyldy.
Bul materıaldar Dostyq, Abylaı han dańǵyldary men Gogol, Maqataev jáne Naýryzbaı batyr kóshelerinen shyqty. Qyryp alynǵan asfaltbeton 100-den astam kóshege qoldanyldy.
Sonymen qatar, jol aıyryǵyndaǵy 35 myń sharshy metr plıta alyndy. 11 myń sharshy metri tonnelderdiń túbine tóseldi. Qalǵany aýdandyq ákimshilikter men «Almaty Tazalyq» JShS-ǵa berildi.
Qala ishindegi joldardy aǵymdaǵy jóndeýden ótkizý kezinde 19 myń metr jol jıegi de qaıta qalpyna keltirildi. Búlinbegen granıt bordıýrler «Almaty Tazalyq» JShS qoımasynda saqtalady. Qaıta qoldaný úshin mekemeler tapsyrys berý qajet.
