Almatynyń barlyq aýdandary úsh jyldyq damý josparyn jasaýy kerek
Jıyn barysynda qala basshysy Baqytjan Saǵyntaev «Almaty-2025» damý baǵdarlamasynyń aldaǵy 5 jylǵa arnalǵan naqty qujaty 2020 jyldyń 1 sáýirine deıin daıyn bolýy kerektigin atap ótti.
«Qalany damytýdyń bas josparynyń tujyrymdamasyn ázirlep, qabyldaý qajet. Sebebi, bul - megapolısti damytýdyń mańyzdy qujattary, olardy 2020 jyldyń 1 qazanynan keshiktirmeı kópshilik talqysyna usynýymyz kerek», - dedi Baqytjan Saǵyntaev.
Sonymen qatar, qalanyń barlyq 8 aýdany 2020 jyldyń 1 naýryzynan keshiktirmeı úsh jyldyq damý josparyn jasaýy tıis.
«Ár aýdan kásibı ýrbanıstermen jáne jergilikti turǵyndarmen kelise otyryp, aýdannyń damý josparyn qurýy tıis. Sondaı-aq, ol polıortalyqtandyrý qaǵıdattaryna sáıkes bolýy kerek. Aýdandardyń biregeıligi de nazardan tys qalmaýy tıis. Eń aldymen onyń áleýmettik ınfraqurylymynyń damýyn qadaǵalaý qajet. Bolashaqta aýdannyń bas jospary júıeli túrde qarjylandyrylady», - dedi ákim.
Aıta keteıik, Almatyda «Kazakhstan Urban Conference -2019» forýmy ótip jatyr.
