Almatynyń Balalar aýyly 20 jyldyǵyn atap ótti
ALMATY. QazAqparat - Almatyda «SOS Balalar aýylynyń» 20 jyldyǵy keńinen atalyp ótildi, dep habarlaıdy QazAqparat tilshisi.
Sara Nazarbaevanyń bastamasymen 1997 jyly alǵash ashylǵan balalar aýyly búginde 20 jyl úzdiksiz jumys jasap, ata-ananyń qamqorynsyz qalǵan balalarǵa pana bolyp keledi. Atalǵan aýyl qurylmastan buryn onyń alǵyshartty 1994 jyly qalyptasyp, jetim balalarǵa kómek uıymdary jumystary júre bastaǵan. Búginde Balalar aýyly baǵdarlamasy aıasynda Qazaqstan boıynsha 25 joba júzege asyrylyp, 31 otbasynda 451 bala ata-ana jylýyn sezingen. Búgingi tańda 1086 bala SOS bala baqshalary men bilim berý ortalyqtarynda tálim alyp jatsa, 96 túlek jeke ómirge qanat qaǵýǵa ázirlenýde. Balalar aýylynyń túlekteri arasynda 69 shańyraq kóterilip, jeke otbasyn qurǵandar bar. 104 bala joǵary jáne arnaıy orta oqý oryndarynda bilim alyp jatyr. Salatantty keshtiń ashylýynda sóz sóılegen Almaty qalasy ákiminiń orynbasary Arman Qyryqbaev Almaty ákimi Baýyrjan Baıbektiń quttyqtaýyn oqyp berdi.
Baýyrjan Baıbektiń quttyqtaý hatynda 166 balaǵa áleýmettik qoldaý kórsetilip, 20-dan astam bala týǵan-týystarymen qaıtadan qaýyshqany aıtylǵan.
«Halqymyzda «El bolamyn deseń, besigińdi túze» degen ulaǵatty sóz bar. Bul árıne, Sara Alpysqyzynyń bastamasy, sol kisiniń erligi. Sol kisiniń bastamasyn qoldaǵan ustazdar, analar qaýymynyń eńbegi dep esepteımiz. Almaty ákimdigi bul uıymǵa árqashan qoldaý kórsetip keledi. Ákimdik tarapynan kórsetiletin qarjylandyrý kólemi arta beretin bolady», - dedi Arman Qyryqbaev.
Aıta keteıik, SOS Balalar aýylynyń» ıdeıasy Eýropada bastalǵan. Alǵash ret gýmanıst German Gmaıner 1949 jyly Aýstrııanyń Imst qalasynda jetim balalarǵa arnalǵan aýyl ashqan. Sodan beri Jer sharynda osyndaı 1810 balalar aýyly qurylyp, qazirgi tańdar ol aýyldarda 1,3 mln bala bala ómir súrip jatyr.
