Almatynyń azyq-túlik qaýipsizdigin qamtamasyz etý məselesi óte ózekti - Baýyrjan Baıbek
ALMATY. QazAqparat - Búgin Almatyda Qazaq Ulttyq Agrarlyq Ýnıversıtetiniń irgesi qalanǵanyna 85 jyl tolýyna oraı oqý ordasynda ǵylymı konferentsııa ótti.
Jıynǵa QR Aýyl sharýashylyǵy mınıstri Asyljan Mamytbekov pen qala əkimi Baýyrjan Baıbek qatysty. Mınıstr oqý ornynyń mereıtoıyna baılanysty Memleket basshysy Nursultan Nazarbaevtyń quttyqtaý sózin jetkizdi. "Qazaq ulttyq agrarlyq ýnıversıtetiniń ujymyn 85 jyldyǵymen quttyqtaımyn. Ýnıversıtet - elimizdegi aýyl sharýashylyǵy óndirisine arnap bilikti mamandar daıyndaıtyn irgeli oqý orny. Ony myńdaǵan túlekter bitirip, otanymyzdyń AÓK salasynyń damýyna úles qosty. Ýnıversıtet óz jumysyn zaman talabyna saı uıymdastyryp keledi. Stýdentterge sapaly bilim berip, ǵylymı-zertteý nátıjesin arttyrýda. Innovatsııalyq izdenisterdi damytýda. Álemde halyq sany ósip, sapaly azyq-túlikke degen suranys barǵan saıyn artyp otyrǵan kezde aýyl sharýashylyǵy óndirisi salasy árdaıym ózekti bolyp qalady. Bul baǵytta Ýnıversıtet ujymyna júkteletin jaýap arta túseri anyq", - dedi mınıstr. Qala əkimi Baýyrjan Baıbek Almaty qalasynyń damýyndaǵy agrarlyq salanyń alar orny týraly aıtyp ótti. "Memleket basshysy ǵylymnyń damýyna úlken mən berip otyr. Jaqynda Almatyǵa saparynda ol qalanyń aýqymdy megapolıs retindegi mańyzyn tilge tıek etti. Qala turǵyndaryn azyq-túlikpen qamtamasyz etý asa ózekti məsele. Almatynyń damýy oblyspen tikeleı baılanysty. Ýnıversıtettiń ımporttyq ónimderdiń ornyn basý maqsatynda salalyq klasterdi qalyptastyrýda qosyp otyrǵan úlesin aıta ketý mańyzdy", -dedi qala əkimi.
