Almatynyń aıazynda kólik otaldyrý qyzmetin paıdalanýshylar kúrt kóbeıdi
ALMATY. QazAqparat - Almatyda aıaz túskeli beri kólik otaldyrý qyzmetine suranys kúrt artqan. Kóligin otaldyra almaǵandar amalsyz aqyly qyzmet túrine kezekke turyp jatyr, dep habarlaıdy QazAqparat tilshisi.
Sınoptıkter Almatyǵa shyńyltyr aıaz túsetinin eskertken bolatyn. Mamandar apta sońynda aýa temperatýrasy kúndiz - 25, túnde keı jerlerde -36 gradýsqa deıin tómendeıtinin aıtqan. Osyǵan baılanysty Almatyda kólik otaldyrý qyzmetin kórsetýshiler kóbeıdi. Jarnama saıttarynda osyndaı qyzmet túrin usynǵandar tizimge turýshylardyń qatary kóp ekenin aıtty.
Ózin Pavelmin dep tanystyrǵan jigit búgin ǵana jarnamasyn ile salysymen birneshe kólik otaldyrǵanyn, erteńge 3 adam kezekke jazylǵanyn aıtty.
«Men munymen buryn aınalysqanym joq. Búgin ǵana jarnama bergenmin, 3 adam erteńge jazylyp qoıdy. Bir kólikti 10 myń teńgege otaldyryp, qyzdyryp beremin», - dedi ol.
Jarnama saıtynda ózin TJO úılestirýshimin dep tanystyrǵan Marat esimdi qazaq jigit tańǵy qarbalasta baǵa qymbattaıtynyn jetkizdi.
«Bizdiń qyzmetimiz 8 000 teńge. Eki sheber barady, onyń bireýi elektr baǵytyndaǵy maman. Kóliktegi barlyq ahaýdy qarap beredi. Búgin keshki saǵat 20:00-ge deıin tizim tolyq. Segizden keıin shaqyrtamyn deseńiz, jazylyńyz. Júk kólikterinen de bizge suranystar túsip jatyr. Eger tańerteńgi qarbalas ýaqytynda shaqyrtsańyz 12 000 teńge bolady», - dedi Marat.
Aıaz adamdardyń tabys kózine de aınalǵanyn Arkadıı esimdi jigittiń aıtqanyn bilýge bolady. Bizben emen-jarqyn áńgimelesken ol kúnine 10 myń teńgeden 10 kólikke deıin otaldyryp beretinin aıtty. «Tipti, kólikti maıyn da aýystyryp beremiz»,- deıdi.
«Men kóligińizdi 10 000 teńgege otaldyryp beremin. Barlyq kemshilikterin qarap, maıyn da aýystyramyz. Aldyn ala erteńge jazylyp qoımasańyz, búginge tizim tolyq. Kúnine 7-8 keıde, 10 kólikke deıin otaldyramyz. Sheberlerimiz túnimen de jumys isteıdi, tańda shaqyrtatyn bolsańyz, meken jaıyńyzdyń ornaldasýyna baılanysty baǵa da qymbat bolady. Byltyr 6-7 myń teńgeden kólikterdi otaldyrǵanbyz», - dedi Arkadıı.
Aıaz Almaty tirshiligine ózgeris ákeldi. Kólikteri otalmaǵan júrgizýshilerden bólek, sýyq kúni qoǵamdyq kólik túrin paıdalanǵysy kelgender esebinen qalada kólik sany azaıdy. Sonymen qatar, aıazǵa baılanysty kóp jyldan beri alǵash ret mektepterde de sabaq toqtatylǵan bolatyn. 26 qańtarda bastaýysh synyptarǵa sabaq toqtatylsa, 27 qańtar erteń joǵarǵy synyp oqýshylaryna sabaq ótkizilmeıtin bolady.
