Almatynyń avtobýs júrgizýshileri 4 saǵat qana uıyqtaıdy - Isahov
ALMATY. QazAqparat - Almaty qalalyq Jolaýshylar kóligi men avtomobıl joldary basqarmasynyń basshysy Maqsut Isahov avtobýs júrgizýshileriniń tártibi men mádenıetine qatysty pikir bildirdi, dep habarlaıdy QazAqparat tilshisi.
Basqarma basshysy avtobýs júrgizýshileriniń tártibine qatysty suraqqa jaýap bere kele, olardyń jalaqysynyńazdyǵy men jumystyń aýyrlyǵyn eskerý qajet ekenin aıtty.
«Menińshe, negizgi másele - jalaqyda. Biz transport kompanııalarynyń esebin alyp otyramyz, onda tómengi jalaqy 189 myń teńge dep kórsetilgen. Al jumys grafıgin qarańyz. Júrgizýshiler tańǵy 6:30-nan keshki 21-ge deıin júredi. Sondyqtan, Almatyda júrgizýshilerdiń jetispeýshiligi shamamen - 30 paıyz. Jumys óte aýyr», - dedi ol.
Maqsut Isahov 12-shi baǵyttaǵy avtobýsta jolaýshyǵa «Ońaı» kartasy arqyly eki ret tólem jasatqan jaǵdaı boıynsha júrgizýshimen jeke ózi sóıleskenin aıtty.
«Men bir jolaýshydan eki ret tólem alǵan 12-shi baǵdardaǵy avtobýs jrgizýshisimen sóılestim. Ol jumystyń aýyrlyǵyn alǵa tarty. Tańǵy 5-ten turyp, keshki 9-da jumysty aıaqtap, túngi on birde úıine sharshap, áreń jetedi. Júrgizýshiler 4 saǵat qana uıyqtaıdy. Sol kúni onyń aıtýynsha, salonda 70-ten astam adam bolǵan, biraq «Ońaımen» 17 adam ǵana jolaqy tólegen. Osydan keıin, júrgizýshi 80 teńgesin jolǵa qımaı turǵan jolaýshylarǵa qatty renjip, avtobýsty toqtatyp tastaǵan. «Barlyǵy tólem jasamaı júrmeımin dep avtobýsty toqtatyp tastaǵanyń qate», dedim. Biraq, ol solaı jasaýǵa májbúr bolǵan. Men onyń áreketin aqtamaımyn, alaıda jolaýshylar da júrgizýshini osyndaı jaǵdaıǵa jetkizetin kezder kezdesedi», - dedi Isahov.
Maqsut Isahov basqarma qoǵamdyq kóliktegi qyzmet kórsetý sapasyn arttyrýǵa kúsh salatynyn málim etti. Ol úshin birneshe baǵdarǵa bıýdjetten demeýqarjy bólinbek.
«2017 jyly 15 baǵdarǵa demeýqarjy qarastyryldy. 2018 jyly 44 baǵdarǵa demeýqarjy berý úshin 7,5 mlrd teńge bólindi. Demeýqarjy týraly kelisimshartty ázirlegende biz onyń mátinine júrgizýshiniń mádenıetti bolýy, transporttyń tazalyǵy, aralyq jıiliktiń qysqalyǵy týraly birneshe bapty engizdik», - dedi M. Isahov.
Aıta keteıik, 2017 jyldyń qorytyndysy boıynsha Almaty qalasy qoǵamdyq kólikterinde 220 mln jolaýshy tasymaldanǵan. Bul 2016 jylmen salystyrǵanda 20,6 %-ǵa artyq. Tranzaktsııalardan 13 mlrd teńge kiris kelgen.
