Almatynyń aýmaǵy 11 myń 921 gektarǵa ulǵaıady
ALMATY. 22 mamyr. QazAqparat - Almatyda qala shekarasyna Almaty oblysynyń Qarasaı jáne Talǵar aýdandarynan jalpy kólemi 11 myń 921 ga bolatyn jerdi engizetin boldy.
Bul týraly Almaty ákimdiginiń qaýlysy negizinde búgin V shaqyrylymdaǵy Máslıhattyń V sessııasynda sheshim qabyldandy. Respýblıkalyq mańyzy bar qalany odan ári damytý úshin mundaı sheshimniń qabyldanýy óte oryndy. Óıtkeni Almatyda qazir týrızmdi damytý, ónerkásiptik ınfraqurylymdy jańartý, megapolıstiń jol toraptaryn keńeıtý, áleýmettik qurylys nysandaryn salýdy ulǵaıtý, qala shekarasyn retke keltirý kún tártibinde turǵan kókeıkesti máseleler bolyp otyr. Mysaly jańadan qosylǵan jerlerge «Kók-Jaılaý» taý shańǵysy kýrorty, bobsleıli trassa, jabyq muz aıdyny, «Búkilálemdik qysqy ýnıversıada-2017» sport nysandaryn salý josparlanýda. Sol sebepti Almaty qalasynyń shekarasyn ózgertý jobasy máslıhat sheshimimen birge QR Úkimetine jiberiledi.
Máslıhat sessııasynda budan basqa 2012 jylǵy naqtylanǵan bıýdjet pen qalada jolaýshy kóligi men júk tasymaldaýǵa biryńǵaı tarıfti engizý máseleleri qaralǵan bolatyn. Almaty qalasynyń 2012 jylǵy bıýdjeti 338 mlrd. 254 mln. 197 myń teńge bolyp bekitildi. 2012 jylǵy bıýdjetti naqtylaýda onyń kiris jáne shyǵys bóligi 7 mlrd. 264 mln. 982 myń teńgege ulǵaıǵan. Buǵan salyq jáne basqa tólemderdiń oń qozǵalysy men burynǵy qaldyqtardy durys bólý arqasynda qol jetip otyr. Bul qarjy endi bilim, densaýlyq saqtaý, áleýmettik qorǵaý, mádenıet, sport, jastar saıasaty, energetıka men turǵyn úı-kommýnaldyq sharýashylyq salalaryn damytýǵa jumsalatyn bolady.
