Almatynyń áýejaıynda synap tókken adamdy qamaýǵa alý merzimi eki aıǵa uzartyldy
ALMATY. QazAqparat - Almaty áýejaıynda synapty zańsyz alyp ótpek bolǵan er adamdy tergeý amaldaryna baılanysty qamaýda ustaý merzimi taǵy eki aıǵa uzartyldy, dep habarlaıdy «QazAqparat» tilshisi qalalyq sottyń baspasóz qyzmetine silteme jasaı otyryp.
«Kúdiktini qamaýda ustaý merzimi 2017 jyldyń 2 qańtaryna deıin uzartyldy», - dedi baspasóz qyzmetinen.
Buǵan deıin Almaty qalasy Túriksib aýdandyq sotynyń qaýlysymen kúdikti E.S-ti eki aıǵa jeltoqsannyń 3-ne deıin qamaýǵa alýǵa sanktsııa berilgen. Kúdiktige qatysty qoǵamdyq qaýipsizdik pen qoǵamdyq tártipti buzǵany úshin qylmystyq is qozǵalǵan. Ol Qazaqstan Respýblıkasynyń shekarasynan jáne Keden odaǵy kedendik baqylaý shekarasynan zańsyz jolmen salmaǵy 1 keli 950 gramm bolatyn hımııalyq element - synapty alyp ótpek bolǵan. Osy faktige baılanysty QR QK 286-babynyń 1-bóligi boıynsha qylmystyq is qozǵaldy.
Eske sala keteıik, Almaty halyqaralyq áýejaıynda 3 qazan kúni «Almaty-Tbılısı baǵytyndaǵy «Eır Astana» áýe kompanııasynyń № 141 reısindegi jolaýshylardy tekserý barysynda bir jolaýshynyń qol júginen quramynda synaby bar qutydaǵy suıyqtyq baıqalǵany habarlanǵan bolatyn.
«Jolaýshynyń qol júginen suıyq zat baıqalyp, teksergende, onyń synap ekeni anyqtalǵan. Osydan keıin jolaýshy eshkimnen suramastan, ony qoqys shelegine tastaı salǵan. Synap sonda tógilgen. Oqıǵaǵa qatysty 6 reıs keshigip ushty. 3-eýi ishki reıs, qalǵany halyqaralyq reıster», delingen habarlamada.
