Almatynyń aýasy birshama jaqsardy
ALMATY. 6 sáýir. QazAqparat /Názıra Eleýhan/ - Jergilikti ókimettiń qoldanyp jatqan sharalarynyń arqasynda Almaty qalasynyń atmosferalyq aýasy jaqsarýda.
Ótken jylǵa qaraǵanda qala aýasynyń lastaný deńgeıi 2,6 myń tonnaǵa azaıǵan.
Qalalyq tabıǵı resýrstar jáne tabıǵatty paıdalanýdy retteý basqarmasynyń málimetterinshe, aǵymdaǵy jyly naýryz aıyndaǵy aýa lastanýdyń kórsetkishi 10,4-ti (IZA5) quraıdy. Ótken jyly bul kórsetkish - 12,1 bolsa, 2009 jyly naýryz aıynda - 13, 6-ny kórsetken bolatyn. Bıylǵy jyldyń birinshi toqsanynda IZA 5 - 10,9-dy qurasa, ótken 2010 jyly dál osy merzimde bul kórsetkish - 13,3-ti kórsetken, al 2009 jyly aýanyń lastanýy 13,5 quraǵan.
«Jaqsarý, aýa lastanýynyń azaıýy avtokólikterge tehnıkalyq tekserýler men baqylaýlardyń kúsheıtilgendiginiń arqasynda, sonymen qatar jaǵarmaıdyń sapaly bolýyn qadaǵalaýdyń, kólikterdiń gazben júrý jańa baǵdarlamasynyń engizilýiniń jáne taǵy da basqa sharalardyń arqasynda bolyp otyr. Qazirgi ýaqytta jylý beretin kásiporyndar gaz qazandyqtarynan mazýtqa, al jer úıler kómirden gazǵa kóshýde. Ol jaǵdaılar da aýa lastanýyn kemitýde. Máselen, 2010 jyly 64 shaqyrym gaz qubyrlary tartylyp, 20 myń jer úılerge gaz berildi»,- deıdi basqarma mamandary.
Búginde qala aýasynyń lastanýynyń tómendeýine birinshi kezektegi shyǵys aınalma jolynyń engizilýi de úlken ról atqaryp otyr, sonymen qatar, kúrdeli jáne ortasha júrgizilgen jol jóndeý jumystary da yqpal etýde.
