Almatynyń arhıtektýralyq kelbeti birkelki úlgige kóshedi
ALMATY. QazAqparat - Almaty qalalyq josparlaý jáne ýrbanıstıka basqarmasy qalanyń dızaın-kody aıasynda mańdaıshalardy ilý erejeleriniń tanystyrylymyn jarııalady, dep habarlaıdy QazAqparat tilshisi.
Dızaın-kod – qala órkendeýiniń negizgi bólshekteriniń biri. Bul – qalany, qala kóshelerin, qoǵamdyq aımaqtardy bezendirýdiń biryńǵaı sáýlettik stıli. Jobanyń maqsaty – ǵımarat qasbetteriniń elementterin turǵyzýǵa qoıylatyn jalpy talaptardy ázirleý: kire beris, mańdaıshalar, aqparattyq taqtalar, balkon qorshaýlary, aýabaptaǵysh jáne t.b.
Nysannyń qasbetine birneshe uıymdardyń, jeke kásipkerlerdiń belgilerin bir syzyqta, bir bıiktik qataryna qoıý usynylady.
«Vızýaldy shýdyń saldarynan adamdar qalany baǵalamaıdy. Ǵımarattardyń sáýlettik qundylyǵy joǵalyp barady. Adamdar kóz tartatyn ádemilikti kórmeıdi. Nátıjesinde qala turǵyndary kóshede serýendeýdi qoıyp, bos ýaqyttaryn saýda ortalyqtarynda ótkizedi. Durys dızaın–kod serýendeý mádenıetin qaıtarady. Qazir adamdar kósheni demalys orny retinde qabyldamaıtyn boldy. Qala ortalyǵynyń nasharlaýy turǵyndardyń da, shaǵyn bıznestiń de zardap shegýine ákeledi. «Jarnamalyq anarhııanyń» arqasynda úlken resýrstardy iri kompanııalar basyp alǵan. Shaǵyn bıznes jarnamalyq keńistiktegi básekelestikke tótep bere almaıdy. Eger barlyq belgiler syrtqy kelbeti men ólshemi boıynsha birkelki bolsa, barlyq kásiporyndar teń dárejede júredi jáne saýda ortalyqtarynan kóshege oralǵan áleýetti klıentterdi tartýǵa múmkindik bar», - dep sanaıdy departamenttegiler.
Sonymen qatar, ǵımarattardyń syrtqy kelbetiniń negizgi problemalary ataldy: arhıtektýraǵa nazar aýdarmaý; shekteýli aımaqta belgi qoıý; tarıhı ǵımarattardaǵy eski qasbetter; jabyq terezeler;
Negizgi máselelerdi sheshýge arnalǵan usynystar: Mańdaısha ilýdi azaıtý; Belgi men tańbalar sanyn tómendetý kerek. Mańdaıshada tek úsh ólshemdi áripterdi qoldanyńyz (kez kelgen belsendi belgi qatty áser etedi jáne kórinisti buzady); arhıtektýralyq elementterge - terezege nemese esikterge belgilerdi baılanystyrý qajet.
Basqarmanyń habarlaýynsha, 2019 jyldyń qańtar-qyrkúıek aralyǵynda talapqa saı emes 3521 jarnama joıyldy.
Tanystyrylymnyń tolyq nusqasymen myna jerden tanysýǵa bolady.
