Almatynyń aptaby aq aıýlar men lamalarǵa qıyn tııýde
ALMATY. QazAqparat - Almaty zoobaǵynda Arktıka men And taýlary tabıǵatyna beıimdelgen janýarlardyń aptap ystyqtaǵy tirshiligi týraly aıtyldy, dep habarlaıdy QazAqparat tilshisi.
Qalalyq haıýanattar baǵynda Avstralııadan Muzdy muhıtqa deıingi aralyqty mekendeıtin, álemniń barlyq klımattyq zonasynan jınalǵan janýarlar bar.
«Bulardyń arasynda tek Antarktıda faýnasynyń ókilderi ǵana joq. Árıne Ortalyq Azııanyń shuǵyl-kontınentaldi klımaty barlyǵyna birdeı jaǵa bermeıdi. Ásirese osy jaz maýsymy qalyń júndi aq aıý men qodasqa ońaı bolmaı tur. Aq aıý mundaı aýa raıyna múlde beıimdelmegen. Oǵan týndranyń ózinde jaz aılaryn ótkizý qıynǵa soǵady. Onyń mekeni Arktıkanyń shetsiz muz aıdyny. Bıik qarly taýlardy mekendeıtin qodastar úshin de dala tabıǵaty qolaısyz. Lamalar And taýlarynyń etegin meken etedi»,-dedi Almaty zoobaǵynyń qyzmetkeri Mıhaıl Sorokoýmov.
Mundaı klımat kezinde tek Tıan-Shan qońyr aıýy men dala qasqyrlary sııaqty janýralar ózin jaıly sezinedi.
«Óz otanynda kez kelgen janýar aýa raıynyń normadan aýytqýshylyǵyna tóze alady. Al buǵan basqa klımatta shydamdylyq tanytý qıynyraq. Onyń ústine bıylǵy qys qatty bolyp, kóktemde aspan nóserden ashylmady. Jazda tal tústegi qapyryqtan qorǵaný úshin qyzmetkerler torda ishýge arnalǵan sýdyń, kóleńkeniń bolýyn jiti qadaǵalaıdy. Keıde aptap ystyqta keıbir janýarlarǵa muzdatylǵan jemister, et nemese balyq daıyndalady»,-dedi Mıhaıl Sorokoýmov.
Haıýanattar baǵynyń qyzmetkerleriniń aıtýynsha, mundaı jaǵdaıda qajet bolyp jatsa janýarlarǵa kómekke veterınarlar keledi.
Foto: Mıhaıl Sorokoýmov
