Almatynyń Altynsarın kóshesinde jol qozǵalysy shekteledi
ALMATY. QazAqparat - Almatynyń Altynsarın kóshesinde gaz qubyryn jańartýǵa baılanysty jol qozǵalysy jazdyń ortasyna deıin shekteledi, dep habarlaıdy QazAqparat tilshisi.
Atalǵa ýchaskede «QazTransGaz Aımaq» AQ-y fılıalynyń tapsyrysy boıynsha Altynsarın kóshesi boıymen ótetin «Orta qysymdaǵy jer asty gaz qubyryn jańartý» jobasy qolǵa alyndy.
Qalalyq ákimdiktiń baspasóz qyzmeti habarlaǵandaı, jalpy uzyndyǵy 2,8 shaqyrym bolatyn jerasty gaz qubyry almatylyqtardy gazben turaqty ári úzdiksiz qamtamasyz etýge múmkindik bermek.
Joba boıynsha qaıta jasaý jumystary Altynsarın kóshesi boıymen Jandosov kóshesinen Jubanov kóshesinen deıin solǵa qaraı joldyń batys jaǵyn qamtıdy. Qazý jumystary 5 metr aýmaqty qamtıdy.
Jumysty 16 shildede aıaqtaý josparlanǵan. Ákimdik Altynsarın kóshesiniń keıbir ýchaskelerinde jóndeý jumystary júretindikten ońtústik baǵytta kólik qozǵalysynda qıyndyq týatynyn habarlady.
«Atap aıtqanda, 4 sáýir -16 mamyrda - Jandosov kóshesinen Shalıapın kóshesine deıingi ýchaskede, 6 sáýir-25 mamyrda - Shalıapın kóshesinen Abaı dańǵylyna deıingi ýchaskede, 21 mamyr-18 maýsymda - Abaı dańǵylynan Jubanov kóshesi aralyǵynda, 28 mamyr-16 shilde aralyǵynda Jubanov kóshesinen Abaı dańǵylyna deıingi aralyqta jol qozǵalysy shekteledi»,- dedi baspasóz qyzmetinen.
Qala turǵyndaryna barynsha qolaıly bolý úshin jańartý jumystary segment boıynsha, ıaǵnı ár 100 metr saıyn atqarylmaq. Sonymen qatar, qazylǵan aımaqtardyń ústi jabylyp, asfalt birden tóselip otyrady.
Eske salsaq, qala ákimi Baýyrjan Baıbek kóshpeli jıyn barysynda jol qurylysymen aınalysatyn merdiger uıymdardyń jumysyn synǵa alyp, bir jerdi qaıta-qaıta qazýǵa bolmaıtynyn aıtqan bolatyn.
