Almatynyń alty yqsham aýdanynda káriz jelileri áli istemeıdi

ALMATY. QazAqparat – Almaty qalasynyń alty yqsham aýdanynda («14-aýmaq», «Aqbulaq», «AZTM-Alǵabas», «Áıgerim-2», «Ójet», «Samǵaý», «Shańyraq-1») ortalyq sýmen jabdyqtaý jáne káriz jelileri iske qosylmaǵan. Atalǵan másele birneshe jyl kóleminde sheshimin tappaı keledi. Bul týraly Almaty qalasynyń ákimi Erbolat Dosaev Alataý aýdanynyń turǵyndarymen kezdesýinde aıtty, dep habarlaıdy QazAqparat tilshisi.

Qala ákiminiń aıtýynsha, atalǵan kemshilikter joıylmaǵandyqtan jeliler áli paıdalanylmaı otyr.

«Máselen, «14-aýmaq» yqsham aýdanynda 2017 jyldan beri merdiger «Keregetas Kompanı» jelilerdi salyp bitirmegen. Bıyl sáýir aıynda «Keregetas kompanı» jobany oryndaýdyń múmkin emestigin resmı túrde málimdep, ary qaraı iske asyrýdan bas tartty. Meniń tapsyrmam boıynsha «Almaty Sý» kásiporny aqaýlyq aktisin jasady. Bul qujattardyń bolýy jylý berý maýsymy bastalǵanǵa deıin barlyq qajetti jumystardy aıaqtaýǵa múmkindik beredi», - dedi Erbolat Dosaev.

Sondaı-aq, qala ákimi qazir bes yqsham aýdannyń («Áıgerim-2», «Ójet», «Samǵaý», «Aqbulaq», «AZTM-Alǵabas») sýmen jabdyqtaý jáne káriz obektilerin «Almaty Sýǵa» berý úshin qajetti qujattar daıyndalyp jatqanyn, jumystar bıyl 10 mamyrǵa deıin aıaqtalatynyn málimdedi.