Almatynyń Almaly aýdanynda qansha eski úı súriletini belgili boldy
ALMATY. QazAqparat - Almatynyń Almaly aýdanynda barlyǵy 135 eski úı súriletin bolady. Bul týraly búgin Óńirlik kommýnıkatsııalar qyzmetinde ótken baspasóz máslıhatynda aýdan ákimi Jasulan Estenov aıtty, dep habarlaıdy QazAqparat tilshisi.
Búgin Almaly aýdanynyń áleýmettik ekonomıkalyq damý nátıjeleri týraly esep bergen Jasulan Estenov 1930 jyldary salynǵan eski úılerdiń ornyn jańa záýlim turǵyn úı keshenderi salynatynyn aıtty.
«Almaly aýdanynda súrilýge ketedi dep josparlanǵan 135 eski úı bar. Onyń barlyǵyn eshkim bir kúnde súrip tastamaıdy. Biz eski úılerdi satyp alatyn ınvestorlar izdep jatyrmyz. Tóle bı men Áýezov kóshesinde ınvestormen jumys bastaldy. Ondaǵy 4 eski úıdi ınvestor satyp alyp jatyr. Qazirgi ýaqytta satyp alý jumystarynyń 99 paıyzy bitip tur. Búgingi tańda ınvestor barlyq qajetti qujattardy aldy. Ondaǵy 1 páter ıesimen ǵana kelissóz júrip jatyr. Ol jerge jańa turǵyn úı keshenderi salynady. Investorlar ondaǵy páter ıelerimen ártúrli formada kelissózder júrgizdi. Bireýlerinen páterdi aqshaǵa satyp alsa, endi bireýlerimen jańa úı salynǵanda páter berýge kelisip, úı jaldap berip otyr. Dál osyndaı eki eski úı Gogol men Naýryzbaı kósheleriniń qıylysynda bar. Sondaı-aq, Jambyl men Baızaqov kósheleriniń qıylysynda eki úıdi ınvestorlar satyp almaq. Ol úıler 1930 jyldary salynǵan», - dedi aýdan ákimi.
Sonymen qatar, aýdan ákimi turǵyndardyń ortasha aılyq jalaqysy 184 316 teńgege jetkenin aıtty.
«Bul ótken jyldyń sáıkes kezeńimen salystyrǵanda 8% joǵary. Odan bólek, 4148 jumys orny quryldy. Aýdanda kásiporyndar qarqyndy damýda. Ónerkásiptiń eń eski jáne biregeı kásiporyndary: ashytqy zaýyty AZTM, «Bahýs» AQ, «EurasianFoodCorporation» jáne t.b. ózderiniń ınvestıtsııalyq jobalaryn júzege asyryp, óndiristi jańǵyrtýda»,-dedi aýdan ákimi.
