Almatynyń Almaly aýdanynda 700 kamera men 16 jańa baǵdarsham ornatylady
ALMATY. QazAqparat - Almaly aýdanynda jańa baǵdarshamdar men 700 kamera ornatylady, qurylys-montajdaý jumystarynyń bastalýy 2023 jyldyń qyrkúıegine josparlanǵan.
Bul týraly aýdan turǵyndarymen kezdesýi barysynda qala ákimi Erbolat Dosaev aıtty, dep habarlaıdy QazAqparat tilshisi.
Qala basshysynyń sózinshe, jaıaý júrginshilerdiń qaýipsizdigin qamtamasyz etý úshin 2022 jyly Almaly aýdanynda Baıseıitova, Abylaı han, Tilendıev, Bógenbaı batyr, Tóle bı, Rozybaqıev, Qurmanǵazy, Gogol kósheleri boıynsha 13 jańa baǵdarsham ornatyldy.
«Ákimdik 2023 jyldyń mamyr aıynyń sońyna deıin taǵy 16 baǵdarshamnyń qurylysyna jobalyq-smetalyq qujattama ázirleýdi josparlap otyr. Qurylys-montaj jumystaryn 2023 jyldyń qyrkúıeginde bastaý kózdelgen»,- dedi Erbolat Dosaev.
Sondaı-aq ol bıyl Almaly aýdanyna 700 jańa beınekamera ornatylatynyn atap ótti.
«Aýdan turǵyndarynyń qaýipsizdigin qamtamasyz etý úshin 2022 jyly 541 SVM beınekamerasy ornatyldy. Qosymsha 700-800 jańa beınekamera ornatý josparlanǵan. Jol qaýipsizdigin jaqsartý úshin qoldanystaǵy 178 «Sergek» keshenine 2023 jyldyń birinshi toqsanynda taǵy 38 keshendi qosý kózdelip otyr», - dedi qala ákimi Erbolat Dosaev Almaly aýdany turǵyndarymen kezdesýde.
