Almatynyń Almaly aýdanynda 200-deı turǵyn úı aýlasy abattandyrylady
Qala ákimi Baqytjan Saǵyntaev Almaly aýdanynyń ákimi Bekqalı Torǵaevtyń eseptik kezdesýine qatysty. Jıynda aýdan ákimi ótken jyly atqarylǵan is-sharalarǵa qysqasha toqtaldy.
«Basym mindetterdiń biri — aýla ishindegi keńistikterdi keshendi jańǵyrtý. Aýdanda 861 aýla aýmaǵy bar. Ótken jyly 215 aýlaǵa kúrdeli jóndeý júrgizildi. Bıyl 192 aýlany jóndeý josparlanǵan. Osylaısha 40 myńnan astam turǵyn úshin qolaıly orta jaqsarady», delingen habarlamada.
Aýdan ákimi B. Torǵaevtyń málimdeýinshe, byltyr 59 kóppáterli úıdiń turǵyndary «2020 jylǵa deıin óńirlerdi damytý» baǵdarlamasy boıynsha shatyrdy, ınjenerlik jelilerdi jáne 88 lıftti jańǵyrtqan. Bıyl turǵyn úıdi jańǵyrtý 2020-2025 jyldarǵa arnalǵan «Nurly jer» baǵdarlamasy boıynsha jalǵasady.
Aýdanda 7 eski úı buzylyp, onyń ornyna jańa úı salyndy. Osylaısha 52 otbasynyń turǵyn úı jaǵdaıy jaqsardy.
Qala turǵyndary ıesiz jelilerdiń máselelerin jıi aıtady. Ótken jyly kommýnaldyq qyzmetkerlerdiń ıeligine balansyna 8,5 shaqyrym elektr, jylý jáne káriz jelileri berildi. Aýdannyń 15,2 shaqyrym ıesiz jelisi men 18 transformator qosalqy stansasyn qabyldaý sharasy júrgizilýde.
