Almatynyń Alǵabas aýdanynda taǵy 6 kópqabatty úı qısaıdy
ALMATY. QazAqparat – Almaty qalasy Alataý aýdany «Zerdeli-6» shaǵyn aýdanyndaǵy 6 kópqabatty turǵyn úı qısaıdy, dep habarlaıdy QazAqparat tilshisi.
Qalalyq ákimdik 2019 jyldyń jeltoqsan aıynda «Zerdeli-6» shaǵynaýdanda ornalasqan №1/179 turǵyn úı qısaıǵan soń, ondaǵy barlyq toǵyz qabatty úıdi tekserý jóninde sheshim qabyldaǵan. Qolaıly qalalyq orta basqarmasy «Qazaq qurylys jáne sáýlet ǵylymı-zertteý jáne jobalaý ınstıtýty» AQ-men kelisimshart jasady. Qujattaǵy ýaqytqa sáıkes, qaıta qalpyna keltirý jumystary osy jyldyń sońynda aıaqtalýy kerek.
«Búginde 6 úıge qatysty (1/180, 1/160, 1/161, 1/165, 1/167, 1/168) saraptama qorytyndysy shyqty. «Qazaq qurylys jáne sáýlet ǵylymı-zertteý jáne jobalaý ınstıtýty» AQ qorytyndysyna sáıkes, osy úılerdiń irgetasyn nyǵaıtý qajet. Bul jumystar turǵyndardy kóshirmeı júzege asyrylady. Qazir №1/160, 1/161 úılerde irgetasyn nyǵaıtý jumysy júrgizilip jatyr», – delingen ákimdik taratqan habarlamada.
Quqyq qorǵaý organdary úıdiń nege qıǵaısaǵanyn ári bul iske jaýaptylardy anyqtap jatyr.
Eske salaıyq, byltyr 11 jeltoqsanda Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn.
Keıin Baqytjan Saǵyntaev qısaıǵan úıdiń turǵyndarymen kezdesip, ákimdik olardy kóshirýge daıyn ekenin jetkizdi.
