Almatynyń «Alǵabas-6» shaǵyn aýdanyndaǵy taǵy bir qısaıǵan turǵyn úıdiń turǵyndaryna basqa jaıǵa kóshý usynylýda
Onyń aıtýynsha, «Alǵabas-6» shaǵyn aýdanyndaǵy №1/148-shi kópqabatty turǵyn úı apatty jaǵdaıda tur. Onda ómir súrý qaýipti. Gúlnar Toqtabaevanyń aıtýynsha, turǵyn úı ómir súrýge jaramsyz bolyp shyqty.
Alaıda, soǵan qaramastan turǵyn úıdiń páterleri bıyl mamyr aıynyń sońynda báribir halyqtyń áleýmettik osal tobyna jatatyn turǵyndarǵa úlestirilip berilgen. Al, 16 tamyzda úı qısaıa bastaǵan. Kelesi kúni turǵyndarǵa qala ákimdiginiń ókilderi men mamandary kelip, úıdiń apatty jaǵdaıda emes ekendigin, onda ómir súrýge bolatyndyǵyn aıtqan.
«Olar bizge: «bul úı ómir súrýge óte qolaıly, tura berýge bolady», - dep aıtty. Al endi bolsa, «shyǵyńdar» dep jatyr. Soǵan qaraǵanda úı óte qaýipti jaǵdaıda degen sóz. Qazir ákimdik ókilderi jalynyp-jalpaıyp, úıdi bosatýymyzdy, shamamen eki aı merzimge qaladan páter jaldap turýymyzdy surap jatyr. Ótemaqy tóleýge ýáde berdi. Bul jerde bizge osy jaqyn jerden kópqabatty úıdi usynyp jatyr. Ol úıdiń de qandaı kúıde turǵanyn, bir qudaı biledi. Al, ákimdik ókilderi bolsa sol úıdi eki aı ishinde retke keltirip beretinderin aıtýda», -dedi G. Toqtabaeva.
Sonymen qatar, onyń aıtýynsha, búgin qala ákimdiginiń ókilderi aldaǵy 5 qyrkúıekte eki kireberisti 24 páterli turǵyn úıge kóshýdi usynypty.
«Biz osy úıimizde qalsaq dep edik. Úıdi nyǵaıtyp, búkil ınjenerlik júıeni retke keltirip beretin shyǵar dep úmittendik. Al endi bolsa, úıdi bosatyp, «Saıaly» shaǵyn aýdanyna baryp turýymyzdy suraýda. Bizge sol usynǵan turǵyn úıdi baryp qarap edik, ol myna biz turǵan úıden de nashar bolyp shyqty. Biz Muz saraıy mańyndaǵy turǵyn úılerden páter berýin surap edik, sóıtsek biz tıisti sanatyna jatpaıdy ekenbiz. Biraq, zań boıynsha biz sekildi halyqtyń áleýmettik turǵydan osal tobyna jatatyn turǵyndarǵa mundaı úılerden páter berýge bolady», - dedi G. Toqtabaeva.
Aıta ketelik, birinshi ret «Alǵabas-6» shaǵyn aýdanynda bıyl maýsym aıynda №136-shy turǵyn úı qısaıǵan bolatyn. Bul shaǵyn aýdandaǵy turǵyn úıler «Qol jetimdi baspana-2020» memlekettik baǵdarlamasy aıasynda salynǵan.
