Almatynyń Alataý, Medeý aýdandarynda eki jańa avtobýs baǵyty paıda boldy
ALMATY. QazAqparat - Almatyda kólik reformasy jobasy aıasynda jyljymaly quramdy jańalaý jáne baǵyttardy ulǵaıtý jalǵasyp jatyr. Búginnen bastap Medeý men Alataý aýdandarynda №131 jáne №115 baǵyttary boıynsha jańa avtobýstar jolǵa shyqty, dep habarlaıdy QazAqparat tilshisi.
Atap aıtqanda, №115 baǵyty boıynsha Eýro-5 ekologııalyq sanatyndaǵy 16 avtobýs qyzmet kórsete bastady. 9,5 metrli avtobýstar kondıtsıonerlermen, vıdebaqylaý kameralarymen, pandýstarmen jáne basqalarymen jabdyqtalǵan.
Bul ózgerister qala turǵyndarynyń ótinishteri boıynsha ashyldy.
Endi «Ójet» bazary beketinen shyqqan kólikter Alataý aýdanynyń «Terekti» yqsham aýdanyna deıin barady.
Medeý aýdanyndaǵy «Rahat» kondıter fabrıkasy men Qońyr kóshesiniń arasyn qamtıtyn №131 baǵytynda tar joldarda júrýge yńǵaıly syıymdylyǵy shaǵyn avtobýstar júre bastady. Bul baǵytqa 10 avtobýs bólindi.
Osyǵan deıin Almatyda kólikti reformalaý aıasynda №22, 70, 86, 65, 103, 50, 126, 112 baǵyttary boıynsha jańa avtobýstar jolǵa shyǵyp, №77 baǵyt qaıta jańaryp, №1 baǵyt pen №201 magıstraldy baǵyty ashylǵan edi. Kórshi oblystan qalaǵa qosylǵan eldi mekenderdi kólikpen tolyq qamtý úshin 10 baǵyt ashylǵan bolatyn.
Jalpy, kólikti reformalaý aıasynda Almatyda bıylǵy jyly syıymdylyǵy ártúrli 388 avtobýs alyndy, olardyń 260-y baǵyttar boıynsha jolda júr, taǵy da 130 jańa avtobýs aqpan aıynyń sońyna deıin kezeńmen baǵyttarǵa shyǵady. Jeke tasymaldaýshylar da 254 jańa avtobýs aldy, olardyń 91 - i qala joldarynda qyzmet kórsetýde.
