Almatynyń Alataý aýdanyndaǵy mamandandyrylǵan HQKO kúnine myńǵa jýyq adamǵa qyzmet kórsete alady
ASTANA. 4 qańtar. QazAqparat - Búgin Almaty ákimi Ahmetjan Esimov qalanyń Alataý aýdanyndaǵy mamandandyrylǵan halyqqa qyzmet kórsetý ortalyǵynyń daıyndyǵy jóninde jumys keńesin ótkizdi.
Alqaly jıynǵa Qazaqstannyń Іshki ister mınıstri Qalmuhanbet Qasymov pen Qazaqstannyń Kólik jáne kommýnıkatsııa vıtse -mınıstri Sáken Sársenov qatysty, dep habarlady qalanyń resmı saıty.
Jıyndy ashqan qala basshysy Qazaqstan Respýblıkasy Prezıdentiniń tapsyrmasy boıynsha sybaılas jemqorlyqqa qarsy kúresti kúsheıtý maqsatynda elimizdiń tórt qalasynda (Astana, Almaty, Karaǵandy jáne Aqtaý) mamndandyrylǵan HQKO ashylatyndyǵyn, bularda jol polıtsııasynyń tirkeý-emtıhan qabyldaý qyzmetteriniń júzege asatyndyǵyn jetkizdi.
Qazirgi kezde qala basshylyǵy mamandandyrylǵan HQKO ǵımaratynyń qurylysyn aıaqtady, kompıýterler qoıylyp, «TsON» elektrondy baǵdarlamasy ornatyldy. Jańa nysannyń jalpy kólemi 5 myń sharshy metrden astam, ol kúnine 1 myńǵa jýyq adamǵa qyzmet kórsetetin bolady.
Mamandandyrylǵan HQKO-da qalalyqtar óte qysqa ýaqyt (40-60 mın) ishinde kólikterin tirkep, júrgizýshi kýáligin, memlekettik nómirlerin alady. Jańa nysanda emtıhan qabyldaıtyn bólmeler, kólik júrgizetin avtodrom, aıyppul tóleıtin termınaldar da bar. Munda Almaty qalasy Jol polıtsııasy janyndaǵy protsessıngtik ortalyq ornalasqan.
