Almatynyń Alataý aýdanynda jańa poshta bólimshesi ashyldy
ALMATY. Qarashanyń 4-i. QazAqparat /Erbol Azanbek/ - Búgin Almatydaǵy Shańyraq yqshamaýdanynda jańa poshta bólimshesi ashyldy,
dep habarlaıdy QazAqparat.
Bul - Alataý aýdanynyń quramyna kiretin yqshamaýdanda ashylǵan birinshi poshta bólmshesi. Buǵan deıin turǵyndar Áýezov aýdanyna qarasty poshta bólimsheleriniń qyzmetin paıdalanyp kelgen edi. Jańa poshta bólimshesiniń qyzmetin 30 myń turǵyn, onyń ishinde 300 zeınetker paıdalanatyn bolady.
«Bul bólimshede turǵyndarǵa zeınetaqy alý, hat-habar jiberý, basylymdarǵa jazylý syndy poshta qyzmetiniń barlyq túrleri usynylady. Zeınetkerlerge zeınetaqy alýda jeńildik bolý úshin bankomat ornatý kózdelýde. Bul nysan Almaty poshtamtynyń ınfraqurylymdardy damytýdyń 2007-2011 jyldarǵa arnalǵan baǵdarlamasyna sáıkes ashylyp otyr. Atalǵan baǵdarlamaǵa sáıkes aldaǵy ýaqytta qala aýmaǵynda birneshe jańa bólimsheler ashylatyn bolady», deıdi «Qazposhta» AQ baspasóz qyzmetiniń ókili Lıýdmıla Shýstova.
Ashylý sharasyna qatysqan shaǵynaýdan turǵyndarynyń aıtýynsha, jańa bólimshe zeınetkerler úshin óte tıimdi. Óıtkeni buǵan deıin olar zeınetaqy alý úshin 5-6 shaqyrym jol júrýge májbúr bolatyn.
«Osyǵan deıin zeınetaqy alý úshin jol azabyn tartatyn edik. Jaqyn jerden poshta bólimshesiniń ashylýy barlyq turǵyndardy qýantyp otyr. Osy úshin Qazposhta basshylyǵyna alǵys bildiremiz», deıdi turǵyndar.
