Almatynyń Alataý aýdanynda sý qubyrlary men káriz jelilerdiń qurylysy bastaldy
Almaty ákimdiginiń málimetinshe, búgin Alataý aýdanynyń «Terekti» shaǵyn aýdanynda ınjenerlik jelilerdiń qurylysy bastaldy. 66 km sýmen jabdyqtaý jáne sý burý jelileri salynady. Qazirgi ýaqytta Mártók, Tastóbe jáne Túıemoınaq kóshelerinde jumystar júrgizilip jatyr.
Qurylys jumystaryn 2024 jyldyń qarasha aıynda aıaqtap, jobany paıdalanýǵa berý josparlanǵan.
Osylaısha, «Terekti» shaǵyn aýdanynyń 7 myńnan astam turǵyny ortalyq sý qubyry jáne káriz jelilerimen qamtamasyz etiledi.
Bıyl tamyz aıynyń sońyna deıin «Rahat-Mádenıet» shaǵyn aýdany boıynsha 131,7 km ınjenerlik jelilerdiń qurylysy bastalady. Qazirgi kezde qurylys jumystaryna tehnıkalyq daıyndyq júrgizilýde, ol 2024 jyldyń jeltoqsan aıyna deıin jalǵasady. Jobany iske asyrý barysynda 14 myńnan astam turǵyn ortalyq sý qubyry jáne káriz jelilerimen qamtamasyz etiledi.
«Tapsyrys berýshi retinde jobalarda jumys aıaqtalǵan soń shuńqyrdyń aldyn alý úshin syǵylmaıtyn topyraqpen qaıta toltyrýdy, al buryn asfalttalǵan kósheler boıynsha jol tósemin qalpyna keltirýdi qarastyrdyq. Jeliler qurylysy aıaqtalǵan kezde jol-qurylys jumystary júrgiziledi. Osyǵan baılanysty kólik qozǵalysynda ýaqytsha qolaısyzdyqtar týyndaýy múmkin. Bul jumys bizdiń turaqty baqylaýymyzda bolady», - dedi Alataý aýdanynyń ákimi Azamat Qaldybekov.
Aýdan ákimdigi Alataý aýdanyndaǵy retsiz qurylystarǵa baılanysty Almatyǵa qosylǵanǵa deıin de jeke úıler ortalyq kárizsiz salynǵanyn aıtty. Jeke sektordaǵy suıyq qaldyqtar aýladaǵy septıkterge qosylyp, topyraq pen jer asty sýyn lastaıdy, olardyń deńgeıin joǵarylatady. «Sonyń nátıjesinde keı jerde jer asty sýy únemi jer betine shyǵady. Muny sheshý úshin 2023 jyly respýblıkalyq bıýdjetten káriz jelilerin salýǵa qarajat bólindi. Qazir iske asyrylyp jatqan joba ázirlendi. Jeke sektorda jańa jelilerdi salý – qala bıligi aldyndaǵy basym mindettiń biri», - dedi Azamat Qaldybekov.