Almatynyń Alataý aýdanynda kópsalaly aýrýhana salynady
ALMATY. QazAqparat - Almatynyń Alataý aýdanynda kópsalaly aýrýhana salynady. Onda perzenthana, dıagnostıkalyq jáne ońaltý ortalyqtary bolady. Bul týraly Erbolat Dosaev Alataý aýdany turǵyndarymen kezdesý barysynda aıtty, dep habarlaıdy QazAqparat tilshisi.
«Medıtsınalyq qyzmet kórsetý sapasyn jaqsartý maqsatynda jáne emhanalardyń ár turǵynǵa jaqyn ornalasýy úshin bıyl «Saıaly» jáne «Qarasý» shaǵyn aýdandarynda kúnine 200 adamdy qabyldaıtyn dárigerlik ambýlatorııa salynady. Búgingi tańda qurylys-montajdaý jumystaryn júrgizetin kompanııalardy anyqtaýǵa baıqaý jarııalandy. Qurylysty osy jyldyń qyrkúıek aıynda bastalyp, 2023 jyldyń maýsymynda aıaqtaýdy josparlap otyrmyz»,- deıdi Erbolat Dosaev.
Sonymen qatar, ol búginde Alataý aýdanynda kópsalaly aýrýhana joq ekenin atap ótti.
«Alataý aýdanynda kópsalaly aýrýhana salý týraly sheshim qabyldady. Munda perzenthana, dıagnostıkalyq jáne ońaltý ortalyqtary bolady. Kelesi jyly kópsalaly aýrýhananyń jobalaý-smetalyq qujattamasy jasalady»,- dedi Almaty ákimi.
