Almatynyń Alataý aýdanynda eki memlekettik kolledj salynady

ALMATY. QazAqparat – Almaty qalasynyń Alataý aýdanynda eki memlekettik kolledj salynady. Bul týraly qala ákimi Erbolat Dosaev aýdan turǵyndarymen kezdesýde aıtty, dep habarlaıdy QazAqparat tilshisi.

«Kelesi jyldan bastap Alataý aýdanynda eki memlekettik kolledj salynady. Onyń biri - «Zerdeli» shaǵynaýdanynda 380 orynǵa eseptelgen jataqhanasy bar 720 oryndyq kásiptik-tehnıkalyq kolledj. Qazirgi tańda ony salýǵa merdiger uıymdy anyqtaý úshin konkýrs ótkizilip jatyr. Ekinshisi – 380 orynǵa arnalǵan jataqhanasy bar 720 oryndyq ınnovatsııalyq tehnologııalar kolledji. Ol kelesi jyldyń 1-shi toqsanynda Indýstrııalyq aımaqta salyna bastaıdy», - dedi Erbolat Dosaev.

Eske salaıyq, Almatydaǵy birqatar kolledj ben ýnıversıtetter Qonaev qalasyna kóshiriletinin habarlaǵan bolatynbyz.