Almatynyń Alataý aýdanynda avtobýstyń jańa baǵyttary ashyldy
ALMATY. QazAqparat – Almatyda Alataý aýdany turǵyndarynyń ótinishteri negizinde 6 marshrýttyq jeli jańartylyp, keńeıtildi. Bul týraly qala ákimi Erbolat Dosaev málimdedi, dep habarlaıdy QazAqparat tilshisi.
«№129 jáne №132 marshrýttardyń baǵyttary uzartyldy jáne avtobýstardyń sany artty. «Qarasý» jáne «Mádenıet» shaǵyn aýdandaryna baratyn jańa marshrýttar iske qosyldy. Olar №35 avtobýs «Qarasýǵa», №24 avtobýs «Mádenıetke» barady. Shaǵyn aýdandaǵy №103 baǵytyndaǵy avtobýstar jańartyldy. «Shańyraq-1» shaǵyn aýdanyna baratyn №103-shi jáne «Darhan» shaǵyn aýdanyna baratyn №69-shy avtobýstar jańartyldy», - dedi Erbolat Dosaev.
Ol, sondaı-aq, tamyz aıynyń sońyna deıin «Jylý energetık» baǵbandyq qoǵamy turǵyndarynyń ótinishi boıynsha uzyndyǵy 18 shaqyrym bolatyn №142 jańa marshrýt iske qosylatynyn aıtty.
«Sondaı-aq, turǵyndardyń ótinishi boıynsha 20 aıaldamanyń qurylysy júrip jatyr. Jyl sońyna deıin 50 aıaldama salynady. Osylaısha Alataý aýdanynda avtobýs aıaldamalarynyń jetispeýshiligi máselesi tolyǵymen sheshiledi»,- dedi qala ákimi.
