Almatynyń Alataý aýdanynda 53 aýla abattandyryldy
ALMATY. QazAqparat - Almatynyń Alataý aýdanynda aryqtar men aýlalar jóndelip, balalar alańdary salynyp jatyr. Bul týraly Óńirlik kommýnıkatsııalar qyzmetiniń brıfıngisinde aýdan ákiminiń orynbasary Ertis Besirov aıtty, dep habarlaıdy QazAqparat tilshisi.
Onyń aıtýynsha, jyl basynan beri «Aqbulaq», «Qarasý», «Shapaǵat», «Shańyraq-1», «Uljan-1», «Samǵaý», «Kók-Qaınar», «Baıbesik», «Darhan» jáne «Áıgerim» shaǵyn aýdandarynda 69 kóshe boıynsha aryq jelileri salyndy.
«Sý basýdyń aldyn alý maqsatynda, Jasyl ekonomıka basqarmasy tarapynan jyl basynan beri 11 shaǵyn aýdanda jalpy uzyndyǵy 51 km bolatyn 69 kóshe boıynsha aryq jelileriniń qurylysyn júrgizildi. Sonymen qatar, 53 aýla aýmaǵyn abattandyrý jumystary tolyǵymen aıaqtaldy. Almaty qalasynyń sáýlettik kelbetin jaqsartý maqsatynda «Zerdeli» shaǵyn aýdanynda ornalasqan 63 kópqabatty úıdiń qasbeti jóndelip jatyr. Jumystardy 2022 jyldyń qarasha aıynyń sońyna deıin aıaqtaý josparlanýda», - dedi spıker.
Sonymen qatar, ol «Halyq qatysatyn bıýdjet» baǵdarlamasy qarqyndy túre júzege asyrylyp jatqanyn jetkizdi.
«2020 jyly baǵdarlama aıasynda qala turǵyndarynan 99 joba kelip tústi, onyń ishinde turǵyndardyń daýys berýine sáıkes 31 joba júzege asyryldy Búgingi kúni 21 nysannyń qurylysy aıaqtaldy, qalǵan jumystar aıaqtalýǵa jaqyn», - dedi Ertis Besirov.
Bıyl atalǵan baǵdarlamasy aıasynda 1,3 mlrd teńgege 26 joba iske asyrylady.
«24 joba bos jerlerde jańa keńistikter qurýdy kózdeıdi. Bul balalar oıyn alańdary, vorkaýttar men sport keshenderi, jaıaý júrginshiler men jasyl aımaqtar. Sondaı-aq, jobalardy tańdaý kezinde ár shaǵyn aýdandy qamtıtyn qoǵamdyq keńistikti eskerildi. Sondaı-aq, magıstraldy kósheler boıyndaǵy (Rysqulov dańǵyly, Momyshuly kóshesi) jasyl aımaqty tıimdi ustaý úshin avtomatty sýarý júıesin aǵymdaǵy jóndeý boıynsha jumystar júrgiziletin bolady»,- dedi ol.
