Almatynyń Ál-Farabı dańǵylyndaǵy jyldamdyqtyń shektelýi tıimdiligin kórsetti
ALMATY. QazAqparat - Almatyda Ál-Farabı dańǵylynda jyldamdyq saǵat 60 shaqyrymǵa deıin shektelgen bolatyn. Sodan bergi 3 kúnde bir de bir jol erejesin buzý deregi tirkelgen joq. Bul týraly qalalyq PD baspasóz qyzmeti habarlady.
Polıtsııa departamenti jol jyldamdyǵyn shekteýdi engizgeli beri Ál-farabı, Saın, Shyǵys aınalma tasjolynda jol qozǵalysynyń nátıjesin jarııalady.
«Sońǵy úsh jylda júrgizilgen taldaýlarǵa sáıkes, atalǵan tasjoldaǵy jol qozǵalysy avtokólikterdiń sanynyń artýyna, trafıktiń ulǵaıýyna, keıbir júrgizýshilerdiń jaýapsyzdyǵyna baılanysty syn kótermeıtin. 2016 jyly Ál-Farabı dańǵylynda 76 jol apaty bolsa, 2017 jyly - 97, 2018 jyly - 106 jol apaty tirkelgen. Byltyr osy jolda 4 adamnyń ómiri qıylyp, 127 adam jaraqat aldy. Saın kóshesindegi ahýalǵa kelsek, 2016 jyly - 137, 2017 jyly - 169, 2018 jyly 183 jol apatynan 6 adam qaza bolyp, 171 adam jaraqat aldy. Shyǵys aınalma jolynda 1 adam qaza bolyp, 33 adam jaraqat aldy», - dedi qalalyq PD Ákimshilik polıtsııa basqarmasynyń basshysy Jandos Muratalıev.
Aıta ketý kerek, Almatynyń úsh kóshesinde 15 qańtardan bastap jyldamdyq saǵatyna 80 shaqyrymnan 60 shaqyrymǵa túsirildi.
Polıtsııa taratqan málimetke sáıkes, álemdik tájirıbede jol júrý jyldamdyǵyn 5 paıyzǵa ǵana azaıtýdyń arqasynda jol apatynan bolatyn adam ólimin 10-20 paıyzǵa azaıtýǵa bolady.
