Almatynyń Ál-Farabı dańǵylyndaǵy jańa asfalt jol opyrylyp tústi
ALMATY. QazAqparat - Almatyda merdiger uıymnyń káriz júıesine zańsyz qosylýy saldarynan Ál-Farabı dańǵyly boıyndaǵy jańa jol tósemi búlindi, dep habarlaıdy QazAqparat tilshisi.
Almaty ákimdiginiń málimetinshe, qalada zamanaýı óner murajaıyn salý úshin ınjenerlik jelilerdi tartýmen aınalysatyn «Parsek ltd» JShS merdiger uıymy qalanyń káriz júıesine zańsyz qosylǵan. Saldarynan ál-Farabı dańǵyly boıyndaǵy ýchaskede jol tósemine zaqym keldi. Oqıǵa 24 tamyzda keshki ýaqytta boldy.
Qalalyq qyzmetter jol qozǵalysy qaýipsizdigin qamtamasyz etý úshin zaqymdalǵan ýchaskege jedel jóndeý jumystaryn júrgizdi.
Qubyrdy (dıametri 50 sm) tóseý jumystary - murajaı jaqtaǵy qudyqtan jol boıyndaǵy qudyqqa deıin qazý ádisimen júrgizilgeni anyqtaldy. Bul rette qaıta jabý kezinde topyraq durys tyǵyzdalmaǵan, sol sebepti jol tóseminiń (shetki jolaq) tutastyǵy zaqymdanǵan.
«Merdiger jazalanady jáne tıisti ákimshilik sharalar qabyldandy. Jol tósemi merdiger esebinen qaıta qalpyna keltiriletin bolady. Jolaqtyń enine asfaltbeton jabynynyń joǵarǵy qabatyn qaıta tóseý jumystaryn joldyń ishinara jabylýymen 26 tamyzda saǵat 23:00 - den 06:00-ge deıin júrgizý josparlanýda», - dep habarlady Almaty ákimdigi.
Eske salsaq, Almatyda ál-Farabı dańǵylyn jóndeý merziminen buryn aıaqtalǵan bolatyn.
Sondaı-aq ál-Farabı dańǵylynda jıektastar aýystyrylǵanyn habarlaǵanbyz.
