Almatynyń ál-Farabı dańǵylyna 80 km/saǵ jyldamdyq qaıtaryldy
ALMATY. QazAqparat - Almatynyń ál-Farabı dańǵylynda saǵatyna 80 shaqyrym jyldamdyqpen júrýge qaıta ruqsat etiletin boldy, dep habarlaıdy QazAqparat tilshisi.
Qala bıliginen málim etkendeı, turǵyndardan avtojoldarǵa qatysty kóptegen usynystar túsedi. Ásirese, ál-Farabı dańǵylynda 80 km/saǵatpen júrýge qaıta ruqsat berý ótinishteri bar.
Almaty ákimdiginen atap ótkendeı, «is júzinde qala ákimshiligi qoǵamdyq qysymda qalyp otyr».
Ál-Farabı dańǵyly men Shyǵys aınalma joly - bul qalanyń negizgi tranzıttik magıstraldary. Shet memleketterdiń tájirıbesi jyldamdyqty shekteý ortalyq kóshelerge kóbirek qoldanylatynyn kórsetedi, dedi jergilikti atqarýshy organnan.
«Tájirıbe kórsetkendeı, ruqsat etilgen jyldamdyqty 60 km/saǵatqa deıin tómendetkenimen, apatty jaǵdaı qalada jaqsarǵan joq. Ókinishke oraı, jol-kólik oqıǵalarynyń sany artý ústinde», - deıdi ákimdiktegiler.
Shyǵys aınalma joly men ál-Farabı dańǵylyna burynǵy jyldamdyq rejimin qaıtarýdy Almaty qalasynyń Qoǵamdyq keńesi de usynǵan bolatyn.
«Sondyqtan, qoǵam tarapynan túsken kóp ótinishti nazarǵa ala otyryp, Almaty ákimdigi Shyǵys aınalma joly men ál- Farabı dańǵylyna ruqsat etilgen 80 km/saǵat jyldamdyqty qaıtarý jóninde sheshim qabyldaıdy. Bul biryńǵaı aınalma jolyna enetin kóshelerge qatysty oń shara bolyp tabylady», - delingen habarlamada.
