Almatynyń aqyly turaqtary ınvestıtsııany áli aqtamady - kompanııa basshysy
ALMATY. QazAqparat - Almatyda aqyly turaqtardyń operatory - «AlmatySpetsTeh Parkıng» JShS aqyly turaqtar jelisinen áli tabys kórip otyrǵan joq. Bul týraly Interfaks baspasóz máslıhatynda búgin kompanııa dırektory Marat Pirinbekov aıtty, dep habarlaıdy Qazaqparat tilshisi.
Onyń aıtýynsha, 2016 jyldyń ortasynan beri jobaǵa 1 mlrd 302 mln ınvestıtsııa quıylǵan. 2017 jyly 711 mln teńge salynǵan. Bıýdjetke 269 mln teńge túsim tússe, aqy tóleýden jaltarǵandardan 128 mln teńge túsken.
Almaty turaqtarynyń operatory áli ınvestıtsııalyq tabysqa shyqtyq dep aıtýǵa áli erte deıdi.
«Investıtsııany qaıtarý týraly aıtýǵa áli erte. Qansha aqsha jınasaq, sonsha aqsha shyǵyndaımyz. Bıyl 15 myń aqyly turaqqa shyqqan kezde ǵana tabys tabamyz degen jospar bar. Kompanııa shyǵynǵa jumys jasap jatyr dep te aıtýǵa bolmaıdy. Máselen osy ýaqytqa deıin 600 mln jýyq túsim tússe oǵan salyq tólendi, jumyskerlerdiń jalaqysy tólenedi. Kez-kelgen bıznes aıaǵyna turyp ketý úshin 2-3 jyl ótýi kerek. Al tólenbegen aqy úshin aıyppuldan biz aqsha ala almaımyz. Sebebi bul bıýdjettik bap», - dedi Marat Pirinbekov.
Kompanııa dırektorynyń aıtýynsha, qazir qalada kólikter kóp shoǵyrlanǵan jerlerde turaq aqysy kóterilýi múmkin.
«Júrgizýshilerden kóptegen usynystar túsip jatyr. Koll-ortalyqqa qońyraý shalýshylardyń 1 paıyzy turaq aqysyn brondaý týraly usynys bildirip otyr. Brondaý júıesin engizý úshin turaq aımaǵy 80 paıyzǵa tolýy kerek. Qazir bizde 50 paıyzǵa ǵana tolady», - dedi Marat Pirinbekov.
