Almatynyń Abaı dańǵylynda jóndeý jumystary aıaqtaldy
Almaty ákimdiginiń málimetinshe, 2023 jyly ortasha jóndeý jumystary aıasynda uzyndyǵy 6,5 km Abaı dańǵylynyń Tilendıev kóshesinen Dostyq dańǵylyna deıingi bóliginde ortasha jóndeý jumystary josparlanǵan bolatyn.
«Shilde aıynda ortasha jóndeý jumystary bastalyp, ony osy jyldyń 31 tamyzyna deıin aıaqtaý josparlanǵan bolatyn. Qala turǵyndaryna yńǵaıly bolý úshin jumystar túnde júrgizildi. Jóndeý jumystary barysyn jyldamdatý maqsatynda dańǵyl boıynsha eki merdiger uıym qatar jumys istep, kólik júretin bólikti 12 tamyz kúni aıaqtaýǵa múmkindik týyndady. Trotýarlardy jóndeý jumystary 31 tamyzǵa deıin aıaqtalatyn bolady. Qazirgi tańda dańǵyl boıynsha jol tańbalaryn salý jumystary júrgizilip jatyr»,- dep habarlady ákimdikten.
Bıyl jol jóndeý maýsymynda qalada alǵash ret polımerli asfaltbeton jabyny qoldanyldy. Jol qurylysynda polımer qospasyn paıdalaný jabyn sapasy men tózimdiligin arttyryp, bıtýmnyń jýylyp ketýiniń aldyn alady. Sonymen qatar, polımer jol jabynynyń paıdalaný uzaqtyǵyn arttyryp, beriktigi men aıazǵa tózimdiligin qamtamasyz etedi.
Jalpy, qala ákimdigi bıyl 200 shaqyrymnan asatyn 230 kósheni ortasha jóndeýmen qamtýdy josparlap otyr. Qala boıynsha 3097 shaqyrym 2746 kóshe bar. Jaqsy jáne qanaǵattanarlyq jaǵdaıdaǵy joldardyń úlesin bıyl 86%-dan 89%-ǵa, al 2025 jylǵa deıin 95%-ǵa jetkizý josparda.
Atalǵan maqsatta jyl saıyn keminde 200 km jol jóndelip otyrýy qajet. Osylaısha, kórsetilgen jumys kólemi jol ınfraqurylymyn jaqsartý josparlaryna sáıkes keledi.