Almatynyń 450 myńnan astam turǵynynda nesıe qaryzy bar
Qarjy mınıstrligi Memlekettik kirister komıteti basqarmasy basshysynyń orynbasary Aınur Sartaevanyń málimetinshe, búginde «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» zań jobasy ázirlenip jatyr.
«Kóktemde Parlament Májilisine atalǵan zań jobasy engizildi. Endi kúzde bul zań jobasyna qatysty qyzý talqylaýlar ótedi. Búgingi is-sharanyń maqsaty – zań jobasy Parlamentte qaralǵanǵa deıin azamattarmen kezdesip, olardyń qandaı ýáj, usynysy bar ekenin tyńdap, olardy jazyp alyp, depýtattarǵa jetkizý», - dedi Aınur Sartaeva.
Spıkerdiń aıtýynsha, búgingi kúni Almaty qalasynyń 1 mıllıonnan astam turǵynynda nesıe bar. Onyń ishinde 451 myńnan astam azamat nesıeni 90 kúnnen astam ýaqyt tólemegen.
A.Sartaeva málim etkendeı, qazaqstandyqtar bankrottyq boıynsha 3 rásimdi qoldana alady.
«Birinshi rásim »sottan tys bankrottyq« dep atalady. Ony azamattar bankter, mıkroqarjy uıymdary (MQU) jáne kollektorlar aldyndaǵy boryshy 4,9 mln teńgeden (1600 AEK) aspaǵan jaǵdaıda; resmı tabysy joq nemese tabysy eń tómen kúnkóris deńgeıinen (36018 teńgeden) aspaǵan kezde (asyraýyndaǵy adamdar qosa esepteledi) qoldana alady. Bul rette boryshkerdiń múlki bolmaýy tıis jáne bankpen boryshtar boıynsha retteý rásimin júrgizý qajet. Sottan tys bankrottyqty tek bankter, MQU jáne kollektorlyq agenttikter aldyndaǵy qaryzdar boıynsha qoldanýǵa bolady.
Ekinshi rásim – «sot arqyly bankrottyqty» azamattar qaryzy 4,9 mln teńgeden asqanda jáne qaryzdyń qalǵan túri boıynsha qoldana alady. Bul rásim barysynda boryshkerdiń múlki bolǵan jaǵdaıda, ol saýda-sattyq arqyly satylýǵa jatady. Túsken qarajat kredıtorlar aldyndaǵy boryshtardy óteýge jiberiledi.
Úshinshi rásim - «tólem qabilettiligin qalpyna keltirý». Bul rásim arqyly azamat turaqty tabysy bolǵan jaǵdaıda qaryzdy 5 jylǵa deıin bólip tóleýge sot arqyly múmkindik ala alady. Nesıeni qalpyna keltirý jospary qarjy basqarýshysymen birlesip ázirlenedi jáne sotta bekitiledi. Ol úshin eki taraptyń (boryshker men kredıtordyń) kelisimi qajet», - dedi ol.
Aınur Sartaevanyń sózinshe, bankrottyqtyń mynadaı saldary bolady:
- 5 jyl ishinde qaryzdar men kredıtter alýǵa shekteý kózdelgen;
- azamattar bankrottyqty 7 jyldan keıin ǵana qaıta qoldana alady;
- bankrottyqtan keıin 3 jyl ishinde bankrottyń qarjylyq jaǵdaıyna monıtorıng júrgizý kózdelgen. Sondaı-aq jobada azamattardyń bankrot dep tanylǵan kúnnen bastap bir jyl ishinde qarjylyq saýattylyqty arttyrý kýrstarynan mindetti túrde ótýi kózdelgen.
Eske salaıyq, buǵan deıin Parlament Májilisi «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» zań jobasy men ilespe qujattardy talqylaıtynyn habarlaǵanbyz.