Almatynyń 32 jasar kásipkerin óltirip ketken qylmystyq top músheleri ustaldy
ASTANA. Aqpannyń 17-si. QazAqparat /Aıdar Ospanalıev/ - Qaraǵandylyq tártip saqshylary Almaty qalasynyń 32 jasar kásipkerine qaraqshylyq shabýyl jasap, ony óltirip ketken qylmystyq topty quryqtady.
Bul týraly búgin jýrnalıstermen bolǵan brıfıntge Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov aıtty, dep habarlaıdy QazAqparat.
Onyń sózine qaraǵanda, kásipkerdiń denesi jalǵa alynǵan páterde qol-aıaǵy baılanǵan kúıinde tabylǵan. Sondaı-aq kásipkerdiń jeke dúnıeleri men «Infınıtı» markili kóligi urlanǵan. Qolǵa túsken 3 kúdiktiden zattaı aıǵaqtar tabylǵan. Qazirgi tańda olardyń osy tektes ózge de qylmystarǵa qatystylyǵy tekserilýde. Sondaı-aq ustalǵandardyń sybaılastaryn quryqtaý sharalary júrgizilýde.
«Al Óskemende «Toıota» kóliginiń júrgizýshisine jasalynǵan qaraqshylyq shabýyldyń izi sýymaı áshkerelendi. Onda túngi
saǵat 12-ler shamasynda belgisiz eki azamat kólik júrgizýshisin atys qarýymen qorqytyp kólikti tastap shyǵýyn talap etken. Osy áreketten soń oqıǵanyń mán-jaıyna qanyqqan tártip saqshylary qaraqshylyq jasalǵan aımaqtaǵy kóshelerdiń birinen kúdiktilerdi ustady», dedi departament bastyǵy.
