Almatynyń 3 nysany mádenı eskertkishter tiziminen shyǵarylmaq
ALMATY. QazAqparat - Almaty ákimdigi qaladaǵy 3 nysandy mádenı eskertkishter qatarynan shyǵarýdy usyndy, dep habarlaıdy QazAqparat tilshisi.
Qaýlynyń jobasy Elektrondy úkimet portalynyń Ashyq Úkimet bóliminde jarııalandy jáne ol 2018 jyldyń 7 naýryzyna deıin kópshiliktiń talqylaýynda bolady.
Oǵan sáıkes, Almaty ákimdiginiń 2010 jylǵy 10 qarasha kúngi №4/840 «Almaty qalasyndaǵy jergilikti mańyzy bar tarıhı-mádenı eskertkishterdiń memlekettik tizimin bekitý týraly» qaýlysyna ózgerister engizý kózdelgen.
Atap aıtqanda, №3, №68 jáne №73 rettik nómirlerimen belgilengen nysandar tarıhı-mádenı eskertkishter memlekettik tiziminen alynyp tastalatyn bolady.
Olar: №68 eskertkish - Bógenbaı batyr kóshesi, 140 mekenjaıynda ornalasqan burynǵy «Yssyq» qonaq úıiniń (Qazirgi «Tsepter» fırmasynyń keńsesi) ǵımaraty. «Yssyq» qonaq úıi ótken ǵasyrdyń 30-40 jyldaryndaǵy alǵashqy qonaq úı kesheni bolatyn. Úsh qabatty ǵımaratqa Keńes odaǵy kezinde ár óńirden belsendi azamattar forýmdar men sezderge jınalatyn.
Sondaı-aq № 3 nysan - Qorǵan tarıhı-arheologııalyq eskertkishi. Qorǵan b.z.d. VI-III ǵasyrlarǵa tıesili.
№73 sáýlet eskertkishi - Maılın kóshesinde ornalasqan Almaty áýejaıynyń burynǵy ǵımaraty. Bul - Qazaqstandaǵy alǵashqy áýejaı ǵımaraty. 1937 jyly boı kótergen, 1957 jyly qaıta jóndeldi. Ulttyq naqysh berilgen alǵashqy ǵımarattardyń biri soǵys jyldaryna deıingi qoǵamdyq sáýlet óneriniń jarqyn úlgisi. Qazir munda bıznes-termınal ornalasqan.
Almaty ákimi osy qaýlynyń oryndalýyn baqylaýdy Almaty qalasy ákiminiń orynbasary Arman Qyryqbaevqa júktedi. Qaýly ádilet organdarynda memlekettik tirkelgen kúnnen bastap kúshine enedi jáne ol alǵash resmı jarııalanǵannan keıin kúntizbelik on kún ótken soń qoldanysqa engiziledi.
