Almatynyń 3 aýdanynda órt deposy salynady

ALMATY. QazAqparat – Almatyda Naýryzbaı, Bostandyq, Alataý aýdandarynda órt sóndirý deposy salynady. Bul týraly qalalyq Tótenshe jaǵdaılar departamentinen málim etti, dep habarlaıdy QazAqparat tilshisi.

Mamandardyń aıtýynsha, bul shara órt sóndirýshilerdiń jumysynyń tıimdiligin arttyryp, olardyń oqıǵa ornyna jetý ýaqytyn qysqartady.

Búginde qutqarýshylar dittegen jerine orta eseppen 13 mınýtta jetedi. Qala aýmaǵyndaǵy jaǵdaılardyń 33 paıyzynda jetý ýaqyty - 10 mınýttan astamdy quraıdy.

130 myń adam turatyn Naýryzbaı aýdanynda órt sóndirý deposy joq.

Al Bostandyq aýdanynyń joǵarǵy jaǵynda qurylys qarqyny belsendi júrip jatqandyqtan, 28 myń adam shoǵyrlanǵan 6 shaǵynaýdannyń órt qaýipsizdigin qamtamasyz etý qajettiligi týyp otyr.

«TJD usynysymen Yńǵaıly qala ortasy basqarmasy 2 órt sóndirý bóliminiń qurylysy boıynsha jobalyq-smetalyq qujattama jasap jatyr.

Búginde qalada 17 órt sóndirý bólimshesi jumys istep tur. 190 adam kúnde órt sóndirý qyzmetinde kezekshilik etedi.

Materıaldyq tehnıkalyq bazany nyǵaıtý maqsatynda byltyr bul salaǵa 34 tehnıka berilgen bolatyn. Bıyl órtke qarsy taǵy 13 mashına satyp alý kózdelgen.

Sondaı-aq, órtengen nysandarǵa jetý múmkindigin arttyrý úshin arnaıy mototsıklder satyp alý qolǵa alynǵan.

Aıta ketý kerek, TJD «ARM-Dıspetcher» tájirıbelik júıesin testiden ótkizip jatyr. Jańa júıeniń arqasynda habarlama kelgen ýaqyttan bastap órt sóndirýshilerdiń shaqyrtýǵa attaný ýaqyty 3 ese qysqardy.