Almatynyń №2 Jylý elektr ortalyǵy gazǵa aldaǵy bes jylda kóshiriledi
«Almaty elektr stantsııalary» AQ-ǵa qarasty JEO-2 jáne JEO-3-tiń negizgi óndiristik qyzmeti elektr jáne jylý energııasyn óndirý bolyp tabylady. Kásiporyn Almaty qalasynyń turmystyq jáne óndiristik qajettiliktileri úshin jylý, elektr energııasyn óndiredi. JEO-2 qýaty – 510 MV, al JEO-3 – 173 MVT.
Búginde JEO-2 jáne JEO-3 úshin negizgi otyn Ekibastuz ken ornynyń («BogatyrKómir» razrezi) kómiri bolyp otyr. Tamyzyq otyn retinde mazýt paıdalanylady.
2017 jyly Elbasy Nursultan Nazarbaev JEO-2-ni gazǵa aýystyrý qajettigi jóninde tapsyrma bergen bolatyn. 2020 jylǵy 20 qazanda Úkimet ótkizgen keńeste «Samuryq-Energo» AQ usynǵan JEO-2-niń jumys istep turǵan qazandyqtaryn gazǵa aýystyra otyryp jańǵyrtý jáne gaz ınfraqurylymyn salý nusqasy maquldandy.
QR Energetıka mınıstrliginiń baspasóz qyzmetinen málim etkendeı, búgin vedomstvo basshysy Nurlan Noǵaev Almaty qalasyna sapary barysynda JEO-2 jáne JEO-3 jumysymen tanysty.
N.Noǵaev JEO-2-ni aralaý barysynda mamandardyń kásiporyndy jańǵyrtý boıynsha josparymen jáne JEO-ny gazǵa aýystyrýdyń tehnıkalyq múmkindigimen tanysty.
«Qazirgi ýaqytta Almaty qalasyndaǵy JEO-2-ni gazǵa aýystyrý jobasynyń tehnıkalyq-ekonomıkalyq negizdemesi ázirlendi. Jobany 2025 jyldyń sońyna qaraı kezeń-kezeńimen júzege asyrý josparlanǵan.
Budan bólek, N.Noǵaevqa baıandalǵandaı, qazirgi ýaqytta «Samuryq-Energo» AQ jáne «Samuryq-Qazyna» AQ arasynda Almaty qalasyndaǵy JEO-3-ti gazǵa aýystyrýdyń tehnıkalyq-ekonomıkalyq negizdemesin ázirleýdi maquldaý boıynsha ishki korporatıvtik rásimder júrip jatyr», - dedi mınıstrlikten.
